بارشوں کا 9 واں سلسلہ کل سے شروع ہوگا،ترجمان پی ڈی ایم اے

لاہور(سٹاف رپورٹر) ترجمان پی ڈی ایم نے کہا ہے کہ 29 اگست سے 2 ستمبر تک پنجاب کے بیشتر اضلاع میں شدید طوفانی بارشوں کی پیشگوئی ہے۔راولپنڈی، مری گلیات، اٹک، چکوال، جہلم، گوجرانولہ، لاہور، گجرات اور سیالکوٹ میں بارشیں متوقع ہیں۔ جمعرات کو ترجمان پی ڈی ایم اے کے مطابق ڈیرہ غازی خان، ملتان اور راجن پور میں بھی بارشوں کا امکان ہے ، ریلیف کمشنر پنجاب نبیل جاوید کی صوبہ بھر کے کمشنرز اور ڈپٹی کمشنرز کو الرٹ رہنے کی ہدایات جاری کر دی گئی ہیں جبکہ وزیر اعلی پنجاب کی ہدایت کے مطابق ضلعی انتظامیہ کو الرٹ جاری کر دیا ہے۔مون سون بارشوں سے پنجاب کے دریائوں اور ان سے ملحقہ ندی نالوں میں شدید سیلابی صورتحال ہے،دریائے چناب راوی اور ستلج میں انتہائی اونچے کا سیلاب ہے جبکہ بڑے شہروں میں مون سون بارشوں کے باعث ندی نالے بپھر سکتے ہیں، انہوں نے ہدایت کی کہ تمام ڈپٹی کمشنر اور دیگر افسران فیلڈ میں موجود رہیں، اس کے علاوہ محکمہ صحت آبپاشی تعمیر و مواصلات لوکل گورنمنٹ اور لایئو سٹاک کو الرٹ جاری کر دیاگیا ہے۔شہریوں سے التماس ہے کہ خراب موسم کی صورتحال میں احتیاطی تدابیر اختیار کریں۔انہوں نے ھدایت کی کہ دریائوں کے اطراف اکٹھے ہونے اور سیرو تفریح سے گریز کریں اورآندھی و طوفان کی صورتحال میں محفوظ مقامات پر رہیں غیر ضروری سفر سے گریز کریں اورایمرجنسی صورتحال میں پی ڈی ایم اے ہیلپ لائن 1129 پر رابطہ کریں۔