لاہور (سٹاف رپورٹر)پی ڈی ایم اے کی دریائے راوی، ستلج اور چناب میں حالیہ سیلاب کے باعث ہونے والے نقصانات کی رپورٹ جاری، شدید سیلابی صورتحال کے باعث 22 سو سے زائد موضع جات جبکہ مجموعی طور پر 23 لاکھ 83 ہزار لوگ متاثر ہوئے۔ ریلیف کمشنر نبیل جاوید نے کہا ہے کہ سیلاب میں پھنس جانے والے 9 لاکھ 18 ہزار لوگوں کو محفوظ مقامات پر منتقل کیا گیا۔شدید سیلاب سے متاثرہ اضلاع میں 392 ریلیف کیمپس قائم کیے گئے ہیں،سیلاب سے متاثر ہونے والے اضلاع میں 386 میڈیکل کیمپس بھی قائم کیے گئے ہیں۔ ریلیف کمشنر نے کہا کہ مویشیوں کو علاج معالجے کی سہولت فراہم کرنے کے لیے 333 ویٹرنری کیمپس قائم کیے گئے ہیں۔متاثرہ اضلاع میں ریسکیو ریلیف سرگرمیوں میں 6 لاکھ 9 ہزار جانوروں کو محفوظ مقامات پر منتقل کیا گیا۔
انہوں نے کہا کہ دریائے ستلج میں سلیمانکی کے مقام پہ پانی کا بہائو 1 لاکھ 34 ہزار کیوسک ہے۔دریائے چناب میں بڑا سیلابی ریلا جھنگ اور ہیڈ تریموں سے گزر رہا ہے۔دریائے چناب میں مرالہ کے مقام پر پانی کا بہائو 1 لاکھ 1 ہزار کیوسک ہے۔دریائے چناب میں خانکی ہیڈ ورکس کے مقام پہ پانی کا بہائو 1 لاکھ 76 ہزار کیوسک ہے،قادر آباد کے مقام پہ پانی کا بہائو 1 لاکھ 54 ہزار کیوسک ہے۔ہیڈ تریموں کے مقام پر انتہائی اونچے درجے کا سیلاب ہے۔ہیڈ تریموں کے مقام پر پانی کا بہائو 4 لاکھ 79 ہزار ہے اور مسلسل اضافہ ہو رہا ہے۔
ریلیف کمشنر نے کہا کہ دریائے راوی جسڑ کے مقام پر پانی کا بہائو 66 ہزار کیوسک ، شاہدرہ کے مقام پر پانی کا بہائو 67 ہزار کیوسک ،بلوکی ہیڈ ورکس پر پانی کا بہائو 1 لاکھ 72 ہزار کی کیوسک جبکہ ہیڈ سدھنائی کے مقام پر پانی کا بہا ئو72 ہزار کیوسک ہے ریلیف کمشنر نے کہا کہ نالہ ایک، بئیں اور بسنتر میں نچلے درجے کا سیلاب ہے۔ پلکھو نالہ میں درمیانے سے اونچے درجے کا سیلاب ہے۔ انہوں نے کہا کہ منگلا ڈیم 82 فیصد جبکہ تربیلا ڈیم 100 فیصد تک بھر چکا ہے۔دریائے ستلج پر موجود انڈین بھاکڑا ڈیم 84 فیصد تک بھر چکا ہے۔پونگ ڈیم 98 فیصد جبکہ تھین ڈیم 92 فیصد تک بھر چکا ہے۔
ریلیف کمشنر نے کہا کہ حالیہ سیلاب میں ڈوبنے سے 35 شہری جاں بحق ہوئے۔وزیر اعلی پنجاب کی ہدایات کے پیش نظر شہریوں اورکسانوں کے نقصانات کا تخمینہ لگا کر ازالہ یقینی بنایا جائے گا۔نبیل جاوید نے کہا کہ گزشتہ 24 گھنٹوں میں پنجاب کے بیشتر اضلاع لاہور 42، گجرانوالہ 19، خانیوال اور قصور 12، مری 11، گجرات ،نارووال 5، اور سیالکوٹ میں4 ملی میٹر تک بارش ریکارڈ کی گئی۔ آئندہ 24 گھنٹوں میں پنجاب کے بیشتر اضلاع میں مون سون بارشوں کا امکان ہے۔ مون سون بارشوں کا 9واں اسپیل 2 ستمبر تک جاری رہے گا۔
