راولپنڈی (سٹاف رپورٹر )ڈائریکٹر جنرل راولپنڈی ڈویلپمنٹ اتھارٹی کنزہ مرتضیٰ کی ہدایت پر آر ڈی اے انفورسمنٹ اسکواڈ نے ڈینگی ایس او پیز کی خلاف ورزیوں کے خلاف کارروائیاں کیں۔ کارروائی کے دوران وزیر ٹاؤن اور گرجا روڈ راولپنڈی میں 28 عمارتیں سیل کر دی گئیں جبکہ جی ٹی روڈ پر سواں پل سے ہمرائی بس اسٹینڈ تک تجاوزات ہٹا دی گئیں۔
یہ کارروائیاں پنجاب ڈویلپمنٹ آف سٹیز ایکٹ 1976 اور آر ڈی اے بلڈنگ اینڈ زوننگ ریگولیشنز 2021 کے تحت عمل میں لائی گئیں۔ مذکورہ قوانین کی خلاف ورزی کرتے ہوئے مالکان نے بغیر اجازت اور این او سی کے تعمیرات شروع کی ہوئی تھیں۔ ڈائریکٹر جنرل آر ڈی اے کنزہ مرتضیٰ نے کہا کہ راولپنڈی کے شہریوں کی صحت و سلامتی پر کوئی سمجھوتہ نہیں کیا جائے گا۔ ڈینگی ایس او پیز پر عمل درآمد لازمی ہے اور خلاف ورزی کرنے والوں کے خلاف سخت کارروائی کی جائے گی۔
انہوں نے مزید کہا کہ یہ اقدامات وزیراعلیٰ پنجاب مریم نواز شریف کی ہدایات کے مطابق کیے جا رہے ہیں جنہوں نے تجاوزات اور غیر قانونی تعمیرات کے خلاف زیرو ٹالرنس پالیسی اپنانے پر زور دیا ہے۔ آر ڈی اے نے تمام پراپرٹی مالکان، بلڈرز اور شہریوں سے اپیل کی ہے کہ وہ انسدادِ ڈینگی مہم میں تعاون کریں اور تجاوزات سے پاک، محفوظ اور کشادہ شہر بنانے میں اپنا کردار ادا کریں۔ کارروائی میں اسسٹنٹ ڈائریکٹر بلڈنگ کنٹرول محمد داؤد، بلڈنگ سروئیر عامر محمود ملک، عاصم نواز کھوکھر اور دیگر آر ڈی اے عملہ شریک تھا۔
