ملتان ( سٹاف رپورٹر ) وزیر اعلیٰ پنجاب مریم نواز شریف فلڈ ریلیف کیمپ سے جلالپور پیروالا سٹی کے حفاظتی بند پر پہنچ گئیں جلالپور پیروالا بائی پاس پر وزیراعلیٰ مریم نواز شریف کو دیکھ کر ہزاروں کا مجمع امڈ آیا، وزیراعلیٰ مریم نواز شریف نے جلالپور پیروالا کے لئے مستقل حفاظتی بند بنانے کا اعلان کر دیا مریم نواز نے سینئر صوبائی وزیر مریم اورنگزیب کو جلالپور پیر والا میں انخلا آپریشن کی مانٹیرنگ اور قیام کی ہدایت کر دی، وزیراعلیٰ پنجاب نے اُچشریف کے لئے گیلانی ایکسپریس وے پراجیکٹ کا اعلان کیا وزیراعلیٰ پنجاب نے جلالپور پیروالا کے سیلاب متاثرین کے لئے سپیشل پیکیج کا اعلان کیا جس کے تحت سیلاب کے دوران جاں بحق ہونے والے افراد کے ورثا کے لئے 10، 10 لاکھ امداد کا اعلان کیا گیا۔
مریم نواز شریف نے سیلاب سے منہدم ہونے والے مکمل گھر پر 10 لاکھ اور کمرہ وغیرہ گرنے پر5 لاکھ ، بڑے مویشیوں کے ضیاع پر 5 لاکھ اور چھوٹے جانور کے لئے 50 ہزار روپے امداد دینے کا اعلان کیا وزیراعلیٰ مریم نواز شریف نے سیلاب متاثرین سے پرجوش اور پر اثر خطاب کرتے ہوئے کہا کہ محمد نواز شریف کی بیٹی ہوں، اپنا ہر وعدہ پورا کروں گی، سیلاب سے متاثرہ ایک ایک فرد کا نقصان پورا کریں گے انہوں نے کہا کہ انسانی جان کی کوئی قیمت نہیں دے سکتا مگر جاں بحق افراد کے ورثا کے لئے جو بھی ممکن ہوا.
کریں گے، خود چل کر اپنے جلالپور پیروالا کے مصیبت زدہ بہن بھائیوں کے پاس آئی ہوں مریم نواز شریف نے کہا کہ جلالپور پیروالا میں بہت سے لوگ سیلاب میں پھنسے ہوئے ہیں، سب کو ریسکیو کرنا ہے، سیلاب میں گرنے والے سب کے گھر بنا کر دینا چاہتی ہوں، سیلاب متاثرین ہمارے مہمان ہیں،جب تک پانی نہ اترے گھر نہیں جانا وزیراعلیٰ پنجاب نے کہا کہ سب کو بچانے کی پوری کوشش کر رہے ہیں، بہت بڑا سیلاب اور بہت بڑی تباہی آئی ہے، سیلاب کے دوران جاں بحق ہونے والے کو واپس نہیں لاسکتے مگر ان کے ورثا کے ساتھ پوری ہمدردی ہے اور ان کے ساتھ ہیں مریم نواز شریف نے کہا کہ اللہ تعالیٰ کے حکم پر کسی کا زور نہیں چلتا لیکن ہر فرد کے لئے پوری کوشش کر رہے ہیں .
