لاہور (سٹاف رپورٹر)وزیر اطلاعات پنجاب عظمی بخاری نے کہا ہے کہ پنجاب حکومت سیلاب متاثرین کی بحالی کیلئے اقدامات کر رہی ہے،ہیلی کاپٹر سے امداد پہنچانے کا کام شروع ہو گیا ہے،سیلاب پر سیاست نہیں ہونی چاہیے۔ان خیالات کا اظہار انہوں نے جمعرات کے روز یہاں پریس کانفرنس کرتے ہوئے کیا۔صوبائی وزیرعظمی بخاری نے کہا کہ جلال پور پیر والا میں صورتحال سنگین ہے،لیکن بہتر انتظامات کے ذریعے جلال پور شہر کو بچا لیا گیا ہے جبکہ ہیڈ محمد والا شیر شاہ میں صورت حال کنٹرول میں ہے،جلال پورپیر والا میں جہاں غفلت اور کوتاہی نظر آئی اس کو درست کرنے کی کوشش کی گئی،جلال پور پیروالا میں جاں بحق ہونے والوں کے لواحقین سے وزیراعلی خود ملیں۔انہوں نے کہا کہ بند توڑنے کے عمل میں کوئی سیاسی فیصلہ نہیں ہوتا بلکہ یہ ٹیکنیکل کمیٹی دیکھتی ہے۔
انہوں نے کہاکہ پنجاب نے کسی سے مدد نہیں مانگی،پنجاب جو بھی کر رہا ہے اپنے وسائل سے کر رہا ہے،صوبے میں سیلاب سے متاثرہ علاقوں میں490 میڈیکل کیمپس اور412 ویٹرنری کیمپ موجود ہیں،جہاں متاثرین اور ان کے مال مویشیوں کو طبی امداد فراہم کی جا رہی ہے۔انہوں نے کہا کہ حالیہ سیلاب سے پنجاب کے مجموعی طور پر چار ہزار سے زائد موضع جات متاثر ہوئے ہیں جن میں سے تقریبا 17 لاکھ لوگوں کو محفوظ مقامات پر منتقل کیا گیا جبکہ گزشتہ تین روز میں 13 ہزار 617 افراد کو محفوظ مقامات پر منتقل کیا گیا ہے۔انہوں نے کہا کہ پنجاب حکومت سیلاب متاثرین کی بحالی کیلئے اقدامات کر رہی ہے،وزیر اعلی مریم نواز نے سیلاب کی صورتحال سے موثر انداز میں نمٹا ہے،وہ روزانہ کی بنیاد پر حالیہ سیلاب کے حوالے سے اداروں کے سربراہوں کے ساتھ میٹنگ کرتی ہیں اور انتظامیہ سے پوچھتی ہیں کہ متاثرین کو مزید ریلیف دینے کیلئے کس چیز کی ضرورت ہے۔
عظمی بخاری نے کہا کہ کل ایک پرائیویٹ کشتی چلانے کا واقعہ سامنے آیا،پرائیویٹ کشتی والا سیلاب زدگان کو محفوظ مقام پر منتقل کرنے کیلئے پیسے مانگ رہا تھا،نجی کشتیوں کے مالکان کا معاوضہ طلب کرنے پر وزیر اعلی نے نوٹس لے لیا ہے،سیلاب میں گھرے جلال پور پیر والا کے اسسٹنٹ کمشنر کو ناقص انتظامات پر عہدے سے ہٹا دیا ہے۔انہوں نے کہا کہ خانیوال میں گندم کو بر وقت محفوظ نہیں کیا گیا جس کی وجہ سے گندم خراب ہوئی،حکومت پنجاب کی جانب سے گندم ذخیرہ کرنے والوں کو3 دن کا وقت دیا گیا تھا،اس وقت پنجاب میں گندم ذخیرہ کرنے والوں کے خلاف کریک ڈائون جاری ہے، مصنوعی قلت پیدا کر کے آٹے اور روٹی کی قیمت بڑھانے کی اجازت نہیں دی جائے گی۔انہوں نے کہا کہ وزیر اعلی مریم نواز کی گندم کے ایک ایک دانے پر نظر مرکوز ہے،اس وقت گندم کے ریٹ میں700 روپے فی من کمی دیکھی جا رہی ہے، آٹے کی قیمت میں ناجائز اضافہ برداشت نہیں کیا جائے گا۔
عظمی بخاری نے کہا کہ سعودی حکومت شاہ فیصل ٹرسٹ کی جانب سے آنے والا امدای سامان متاثرین میں تقسیم کیا گیا،وزیراعلی مریم نواز خود سیلاب متاثرین کیلئے ایک بڑے امدادی پیکج کا اعلان کریں گی۔انہوں نے کہا کہ سیلاب پر سیاست نہیں بلکہ پوری قوم کو متحد ہو کر سیلاب میں گھرے لوگوں کی امداد کر نی چاہیے،متاثرین کو درپیش مسائل سے نکالنے کیلئے ان کے ساتھ کھڑا ہونا چاہیے،سیلاب متاثرین کو ہیلی کاپٹر سے امداد پہنچانے کا کام شروع ہو گیا ہے۔وزیر اطلاعات نے مزید کہا کہ سیلاب کی صورت حال کے دوران میڈیا کا کردار مثبت رہا،پنجاب میں حالیہ سیلاب کی صورتحال سے عوام کو صحیح آگاہی دینے اور متاثرین کو ریلیف دینے کے حوالے سے حکومتی اقدامات کی تشہیر کرنے پر میڈیا کو خراج تحسین پیش کرتے ہیں ۔
