راولپنڈی(سٹاف رپورٹر )ڈائریکٹر جنرل راولپنڈی ڈویلپمنٹ اتھارٹی کنزہ مرتضیٰ کی ہدایت پر ایڈیشنل ڈائریکٹر جنرل آر ڈی اے منصور احمد خان نے فنانشل اکاؤنٹنگ اینڈ بجٹنگ سسٹم ، کنٹرولر جنرل آف اکاؤنٹس اسلام آباد کے ساتھ ایس اے پی ای آر پی کے نفاذ کے لیے ایک تاریخی مفاہمتی یادداشت (ایم او یو) پر دستخط کر دیے ہیں۔ اس اقدام کا مقصد آر ڈی اے کے مالیاتی نظام میں شفافیت، کارکردگی اور ڈیجیٹائزیشن کو یقینی بنانا ہے۔ اس تعاون کے تحت آر ڈی اے کے تمام مالیاتی لین دین، بجٹ سازی اور ادائیگیاں ایس اے پی ای آر پی، جو دنیا بھر میں تسلیم شدہ انٹرپرائز ریسورس پلاننگ سسٹم ہے، کے ذریعے انجام دی جائیں گی۔
ایس اے پی ای آر پی کے نفاذ سے آر ڈی اے کے تمام ادائیگی کے نظام کو ڈیجیٹائز اور خودکار بنایا جائے گا، مالیاتی لین دین میں شفافیت اور جوابدہی کو یقینی بنایا جائے گا، اندرونی کنٹرولز کو مضبوط اور دستی مداخلت کو کم کیا جائے گا، جبکہ بروقت مالیاتی رپورٹنگ اور مانیٹرنگ کے ذریعے بہتر فیصلہ سازی کو ممکن بنایا جائے گا۔ ڈائریکٹر جنرل آر ڈی اے نے کہا کہ یہ قدم جدید طرزِ حکمرانی اور مالیاتی اصلاحات کے لیے جدید ٹیکنالوجی کے استعمال کے حوالے سے آر ڈی اے کے عزم کی عکاسی کرتا ہے۔ انہوں نے اس موقع پر کنٹرولر جنرل آف اکاؤنٹس اور ایف اے بی ایس ٹیم کے تعاون کو سراہا۔ ایم او یو پر دستخط آر ڈی اے کے ڈیجیٹل ٹرانسفارمیشن کے سفر میں ایک سنگِ میل ہیں جو حکومتِ پاکستان کے ای گورننس، جوابدہی اور شفافیت کے وژن کے عین مطابق ہیں۔
