اسلام آباد (سٹی رپورٹر) پاکستان مسلم لیگ ن خواتین ونگ این اے 46 اسلام آباد کی صدر میڈم نسرین اشرف نے خواتین کے ایک پروگرام کا انعقاد کیا، پروگرام کا مقصد خواتین ونگ کا آرگنائزیشن سٹرکچر مظبوط کرنا ، خواتین میں ہنر ، سکلز کی آگاہی اور سرکاری سطح پر کیے گئے اقدامات سے فائدہ اٹھانا تھا ، صدر خواتین میڈم نسرین اشرف صاحبہ ، جنرل سیکرٹری میڈم نیئر سلطانہ ، میڈم سائقہ ، اریج امان اللّٰہ ، ثمینہ نازلی سمیت کثیر تعداد موجود تھی ، رکن قومی اسمبلی انجم عقیل خان نے خواتین ونگ کے ایک پروگرام سے خطاب کرتے ہوئے کہا: “سب سے پہلے، میں آپ سب کا شکریہ ادا کرتا ہوں کہ آپ نے اس پروگرام میں شرکت کی اور اپنے قیمتی وقت سے ہمارے لیے وقت نکالا۔ آج کے اس اجلاس کا مقصد خواتین کی ترقی، ان کے کردار کی اہمیت اور انہیں اپنے پیروں پر کھڑا کرنے کے لیے ضروری اقدامات پر روشنی ڈالنا ہے، ہمارا دین اسلام بھی خواتین کو بااختیار بنانے کی تلقین کرتا ہے، اور ہمیں اس بات کو یقینی بنانا ہوگا کہ ہماری بہنیں اور بیٹیاں تعلیم، تربیت اور معاشی ترقی کے مواقع سے فائدہ اٹھائیں۔ حکومت پاکستان اس سلسلے میں متعدد اقدامات کر رہی ہے، جن میں خواتین کو کاروباری قرضے فراہم کرنا.
ووکیشنل ٹریننگ سینٹرز قائم کرنا اور مختلف ہنر سکھانے کے پروگرام شامل ہیں۔ آج کے دور میں ہنر مند ہونا وقت کی اہم ضرورت ہے۔ آپ سب کو چاہیے کہ حکومتی اداروں کے تحت چلنے والے ٹیکنیکل اور ووکیشنل ٹریننگ سینٹرز سے فائدہ اٹھائیں۔ یہ مراکز خواتین کو مختلف ہنر سکھاتے ہیں جن کی مدد سے وہ خود مختار بن سکتی ہیں۔ چاہے وہ سلائی کڑھائی ہو، کمپیوٹر ٹریننگ، بیوٹیشن کورسز، یا آن لائن بزنس شروع کرنے کے طریقے، ان سب سے نہ صرف آپ اپنی روزی روٹی کما سکتی ہیں بلکہ معاشرے میں اپنا مثبت کردار بھی ادا کر سکتی ہیں۔ حکومت نے خواتین کے لیے آسان قرضے فراہم کرنے کے منصوبے بھی شروع کیے ہیں۔ آپ ان اسکیموں سے فائدہ اٹھا کر اپنا کاروبار شروع کر سکتی ہیں۔
چھوٹے پیمانے پر کوئی بھی کاروبار جیسے کپڑوں کی دکان، دستکاری کا کام، یا آن لائن سیلنگ آپ کے لیے کامیابی کے دروازے کھول سکتا ہے۔ میں آپ سب سے گزارش کرتا ہوں کہ آپ خود کو ان مواقع سے فائدہ اٹھانے کے لیے تیار کریں۔ اپنی قابلیت اور ہنر پر بھروسہ کریں اور اپنے خوابوں کو حقیقت میں بدلیں۔ ہم سب آپ کے ساتھ ہیں، اور میں ذاتی طور پر بھی ہر ممکن مدد کے لیے حاضر ہوں۔آخر میں، میں کہنا چاہوں گا کہ اگر ہم اپنی خواتین کو مضبوط کریں گے، تو ہمارا معاشرہ خود بخود مضبوط ہو جائے گا۔ آپ سب اس ملک کا قیمتی اثاثہ ہیں، اور میں آپ کی کامیابی کے لیے دعاگو ہوں۔ اللہ آپ سب کو کامیاب کرے۔ خواتین و حضرات کے لئے مختلف شعبوں میں فری کورسسز میں داخلے جاری ہیں
