اسلام آباد(نیوز رپورٹر)اسپیکر قومی اسمبلی سردار ایاز صادق کا نیشنل پریس کلب اسلام آباد کے نو منتخب عہدیداران کو مبارکباد اسپیکر قومی اسمبلی سردار ایاز صادق نے نیشنل پریس کلب کے الیکشن میں جرنلسٹ پینل کے نومنتخب صدر پریس کلب اظہر جتوئی، محترمہ نیئر علی کو سیکرٹری اور وقار عباسی کو فنانس سیکرٹری بننے پر مبارکباد پیش کی اور نو منتخب قیادت کیلئے نیک خواہشات کا اظہار کیا۔
اسپیکر قومی اسمبلی نے اپنے جاری تہنیتی پیغام میں کہا کہ نیشنل پریس کلب کے الیکشن میں نومنتخب عہدیداران کی کامیابی ان پر صحافی برادری کے بھرپور اعتماد کا مظہر ہے۔ اسپیکر قومی اسمبلی نے اس اعتماد کا اظہار کیا کہ نیشنل پریس کلب اسلام آباد کی نومنتخب قیادت میڈیا کی ترقی اور صحافتی برادری کے اعتماد پر پورا اترنے اور انکے مسائل کو حل کرنے کے لیے اپنی تمام ترصلاحیتوں کو بروئے کار لائے گی۔
اسپیکر قومی اسمبلی نے کہا کہ پارلیمان صحافی برادری کے حقوق کے تحفظ کیلئے اپنا تعاون جاری رکھے گی۔انہوں نے کہا کہ پارلیمان کی پریس گیلری پارلیمان کا اہم جزو ہے۔انہوں نے کہا کہ عوامی مسائل کو اقتدار کے ایوانوں تک پہنچانے اور ایوان میں عوام کی فلاح و بہبود کیلئے ہونے والی قانون سازی کو عوام تک پہنچانے میں صحافتی برادری کا کردار کلیدی اہمیت کا حامل ہے۔اسپیکر قومی اسمبلی نے کہا کہ وہ پریس کلب اسلام آباد کی نومنتخب قیادت کی کامیابیوں اور کامرانیوں کیلئے دعا گو ہیں.
