اسلام آباد (نیوز رپورٹر)چیئرمین سی ڈی اے محمد علی رندھاوا کی زیر صدارت اسلام آباد میں سلاٹر ہاؤس کی تعمیر کے حوالے سے سی ڈی اے ہیڈکوارٹرز میں اہم اجلاس منعقد ہوا. اجلاس میں سی ڈی اے بورڈ ممبران سمیت ڈپٹی کمشنر راولپنڈی، ضلعی انتظامیہ اور دیگر متعلقہ سینئیر افسران نے شرکت کی. اجلاس میں جڑواں شہروں میں گوشت کی ضروریات کو پورا کرنے کے حوالے سے سلاٹر ہاؤس کی تعمیر سے متعلق افسران نے بریفننگ دی.چیئرمین سی ڈی اے محمد علی رندھاوا نے کہا کہ وزیراعظم پاکستان میاں شہباز شریف کی ہدایت پر عملدرآمد کرتے ہوئے جڑواں شہروں کیلئے جدید ترین سلاٹر ہاؤس تعمیر کیا جائےگا ، اجلاس کو بریفنگ دیتے ہوئے بتایا گیا کہ سلاٹر ہاؤس میں جانوروں کو ذبح کرنے کیلئے وسیع پیمانے پر گنجائش سمیت مختلف سہولیات کی فراہمی کو نہ صرف یقینی بنایا جائے گا بلکہ سلاٹر ہاؤس میں گوشت کو محفوظ کرنے کیلئے جدید چلنگ روم اور کولڈ اسٹوریج بھی بنائے جائیں گے. اجلاس کو بریفننگ دیتے ہوئے مزید بتایا گیا کہ سلاٹر ہاؤس کیلئے ابتدائی اسٹڈی کا عمل مکمل کرلیا گیا ہے۔
چیئرمین سی ڈی اے محمد علی رندھاوا نے ہدایت کی کہ سلاٹر ہاؤس کی اپ گریڈیشن کیلئے بہترین فنانشل ماڈل تیار کیا جائے اور اس حوالے سے پرائیویٹ سیکٹر کو موقع دیا جائے تاکہ انکو بھی بہترین بزنس ماڈل پیش کرنے کا موقع فراہم کیا جائے چیئرمین سی ڈی اے نے کہا کہ جڑواں شہروں کی آبادی کی فی کس گوشت کی کھپت کو مدنظر رکھتے ہوئے سلاٹر ہاؤس کی تعمیر جدید تقاضوں کو مدنظر رکھتے ہوئے کی جائے. انہوں نے جڑواں شہروں میں گوشت کی فراہمی کے حوالے سے طلب و رسد کا جائزہ لینے کی بھی ہدایت کی چیئرمین سی ڈی اے نے کہا کہ جڑواں شہروں کی مشترکہ انتظامیہ پر مشتمل میٹ بورڈ تشکیل دیا جائے جسمیں تمام اسٹیک ہولڈرز بھی شامل ہوں. انہوں نے کراچی اور لاہور کے بہترین سلاٹر ہاؤس کے ماڈل کو اسٹڈی کرنے کی بھی ہدایت کی چیئرمین سی ڈی اے نے کہا کہ سلاٹر ہاؤس میں کوالٹی کے معیار کو یقینی بنانے کیلئے اسلام آباد اور راولپنڈی کی انتظامیہ پر مشتمل افسران کا مشترکہ مانیٹرنگ میکنزم تیار کیا جائے. انہوں نے کہا کہ منصوبے کا مقصد جڑواں شہروں میں اعلیٰ، معیاری اور حفظانِ صحت کے اصولوں کے عین مطابق گوشت کی فراہمی کا یقینی بنانا ہے۔
ڈپٹی کمشنر راولپنڈی نے کہا کہ جڑواں شہروں کے باسیوں کیلئے جدید ترین سلاٹر ہاؤس کے قیام کے حوالے سے راولپنڈی اور اسلام آباد کی انتظامیہ ملکر کام کریں گی قبل ازیں چیرمین سی ڈی اے و چیف کمشنر اسلام آباد محمد علی رندھاوا کی زیرِ صدارت سی ڈی اے ہیڈ کوارٹرز میں ایک اہم اجلاس منعقد ہوا. اجلاس میں جڑواں شہروں سے پولیو کے تدارک کیلئے اٹھائے گئے اقدامات پر تبادلہ خیال کیا گیااجلاس میں اسلام آباد اور راولپنڈی کے باؤنڈری ایریاز میں پولیو کے تدارک کیلئے مشترکہ ٹیم تشکیل دینے کا فیصلہ کیا گیا. واضح رہے مشترکہ ٹیم سی ڈی اے، آئی سی ٹی، آر ڈی اے، پی ایچ اے سمیت دیگر متعلقہ اداروں پر مشتمل ہوگی. اجلاس میں فیصلہ کیا گیا کہ متعلقہ انتظامیہ اپنے اپنے علاقوں میں ہائی رسک ایریاز کا دورہ کریں گی چیئرمین سی ڈی اے نے ہدایت کی کہ پولیو کے خاتمے کیلئے اسلام آباد اور راولپنڈی انتظامیہ ون یونٹ کے طور پر کام کرے. اجلاس میں فیصلہ کیا گیا کہ اسلام آباد کی تمام لیبارٹریز، ہسپتال اور ڈسپنسریز پولیو کیس رپورٹ ہونے پر فوراً انتطامیہ کو اطلاع دیں. چیئرمین سی ڈی اے نے کہا کہ پولیو کے تدارک کیلئے افرادی قوت کی کمی کو فوری حل کیا جائے. اجلاس کے اختتام پر چیئرمین سی ڈی اے نے جڑواں شہروں کو پولیو فری سٹی بنانے کے عزم کا اعادہ بھی کیا.
