اسلام آباد (نیوز رپورٹر)چیئرمین سی ڈی اے و چیف کمشنر اسلام آباد محمد علی رندھاوا نے کہا ہے کہ اسلام آباد کی ترقی و خوشحالی اور سیکٹر ڈویلپمنٹ سی ڈی اے کی اولین ترجیح ہے اور اسکے لئے تمام دستیاب وسائل بروئے کار لائے جائیں گے۔ انہوں نے کہا کہ اسلام آباد کو ایک جدید ڈیجٹلائز، سیاحتی اور خوبصورت شہر بنانے کے علاوہ عوام کی رہائشی سہولیات کو پورا کرنے کیلئے نہ صرف سی ڈی اے سیکٹر ڈویلپمنٹ انفراسٹرکچر کی بہتری، بیوٹیفکیشن، تعلیمی اور تفریحی سہولیات کی فراہمی کیلئے تمام توانائیاں صرف کررہا ہے تاکہ عوام کے مسائل کو انکی دہلیز پر حل کرنے میں مدد مل سکے۔ ان خیالات کا اظہار انہوں نے سیکٹر I-12 کے اچانک دورے کے موقع پر کیا۔ اس موقع پر ممبر ایڈمن، ممبر فنانس، ممبر پلاننگ، ممبر انوائرمنٹ، ممبر آئی ٹی، ممبر اسٹیٹ، ڈی جی انفورسمنٹ، ڈی جی ورکس، ڈی جی انوائرمنٹ، ڈی جی سینی ٹیشن، پراجیکٹ ڈرایکٹر سیکٹر I-12، اسلام آباد انتظامیہ کے اعلیٰ افسران سمیت سی ڈی اے کے دیگر افسران بھی انکے ہمراہ تھے۔
چیئرمین سی ڈی اے نے اپنے دورہ کے دوران سیکٹر I-12 میں نہ صرف ترقیاتی کاموں کا ذاتی طور پر جائزہ لیا بلکہ موقع پر متعلقہ افسران کو سیکٹر I-12 میں جاری ترقیاتی کاموں کو مزید تیز کرنے کی ہدایت جاری کی۔ انہوں نے کہا کہ سی ڈی اے کے سیکٹر I-12 سے ہر قسم کی غیر قانونی تعمیرات اور تجاوزات کو فوری مسمار کرنے اور اراضی واگزار کروانے کے علاوہ سیکٹر I-12 سے باقی ماندہ کوڑا کرکٹ فوری طور پر اٹھایا جائے تاکہ ترقیاتی کام بروقت مکمل کئے جاسکیں۔ انہوں نے کہا کہ سیکٹر I-12 اسلام آباد اور راولپنڈی کے سنگم پر واقع ہے جسکی لوکیشن نہ صرف بہترین ہے بلکہ اسلام آباد اور راولپنڈی کے شہریوں کیلئے سیکٹر I-12 ایک گیٹ وے کی حیثیت رکھتا ہے۔ چیئرمین سی ڈی اے نے ہدایت دی کہ سیکٹر I-12 کے ترقیاتی کاموں میں حائل تمام روکاوٹوں کو ترجیح بنیادوں پر حل کیا جائے۔
