اسلام آباد (نیوز رپورٹر)چئیرمین سی ڈی اے و چیف کمشنر اسلام آباد محمد علی رندھاوا کی زیر صدارت سی ڈی اے کا ایک اہم اجلاس سی ڈی اے ہیڈکوارٹرز میں منعقد ہوا۔ اجلاس میں ممبر ایڈمن، ممبر اسٹیٹ، ممبر انجینئرنگ، ممبر پلاننگ، ممبر انوائرمنٹ، ممبر ٹیکنالوجی اور سی ڈی اے کے سینئر افسران نے شرکت کی۔اجلاس میں سی ڈی اے کی مجموعی کارکردگی کا جائزہ خصوصاً سیکٹر ڈویلپمنٹ، بیوٹیفکیشن، سینی ٹیشن، نئی شاہرات اور انڈر پاسز کی تعمیر عوام کی سفری سہولیات میں مزید بہتری خصوصاً الیکڑک بسوں کی تعداد میں اضافہ، کیبل کار، خصوصاً ایف نائن پارک، لیک ویو پارکس کی اپلفٹینگ، تھیم پارک، ایڈونچر پارک کے بارے میں اب تک کی پیش رفت کا جائزہ لیا گیا۔
چیئرمین سی ڈی اے نے تمام پراجیکٹس کا تھرڈ پارٹی آڈٹ کرنے کی ہدایت کے ساتھ ساتھ سیکٹرز ڈویلپمنٹ پر خصوصی توجہ دینے کی ہدایت کی۔ چیئرمین سی ڈی اے نے اسلام آباد کے شہریوں کی پانی کی فراہمی کو یقینی بنانے کے عزم کا اظہار کرتے ہوئے کہا کہ سی ڈی اے نے اسلام آباد کے شہریوں کے پانی کے مسائل کے حل کے لئے جہاں سی ڈی اے نے اسلام آباد واٹر ایجنسی بنائی ہے وہاں پانی کی مستقبل میں فراہمی کے لئے مختلف آپشنز کے بارے میں تفصیلی فزیبلٹی رپورٹ تیار کرنے کے علاوہ قومی اور بین الاقوامی ڈونرز سے بھی قانون کے مطابق رابطہ کرنے کی ہدایت کی۔
چیئرمین سی ڈی اے نے اسلام آباد کی قانونی اور غیر قانونی ہاوسنگ سوسائیٹوں کی لسٹ نہ صرف سی ڈی اے ویب سائٹس پر لگانے اور اسے میڈیا میں مشتہر کرنے کی ہدایت کی تاکہ عوام اپنی سرمایہ کاری کرنے سے پہلے متعلقہ سوسائٹی کی قانونی حیثیت کے بارے میں آگاہ ہوں۔ چیئرمین سی ڈی اے نے بعد ازاں مختلف شہریوں کی ذاتی طور پر شکایات سنیں اور موقع پر احکامات جاری کئے۔
