اسلام آباد (نیوز رپورٹر) چیئرمین سی ڈی اے و چیف کمشنر اسلام اور ڈی جی سول ڈیفنس محمد علی رندھاوا کی زیر صدارت ہفتہ کے روز ملکی ایمرجنسی صورت حال اور اس حوالے سے تیاریوں کے جائزہ کیلئے اہم اجلاس سی ڈی اے ہیڈکوارٹرز اسلام آباد میں منعقد ہوا۔ اجلاس میں سی ڈی اے بورڈ ممبران، ڈپٹی کمشنر اسلام آباد، وزارت تعلیم سمیت پنجاب، کے پی کے، سندھ، بلوچستان، کشمیر اور گلگت بلتستان کے سول ڈیفنس کے افسران کے علاوہ صوبائی ہوم ڈیپارٹمنٹ کے افسران نے بزریعہ زوم لنک شرکت کی۔چیئرمین سی ڈی اے و ڈی جی سول ڈیفنس محمد علی رندھاوا نے موجودہ ملکی حالات میں تمام صوبوں کے مابین رابطہ اور کوارڈینیشن کو مزید موثر بنانے اور رضاکاروں کو مزید متحرک کرنے کی ہدایت کی۔ اجلاس میں اسلام آباد سمیت تمام صوبوں، گلگت بلتستان اور کشمیر کے سول ڈیفنس اور متعلقہ افسران نے کسی بھی ہنگامی صورتحال سے نمٹنے کیلئے اپنی بھرپور تیاریاں کے حوالے سے بریفننگ دی۔
اجلاس کو بریفننگ دیتے ہوئے بتایا گیا کہ اسلام آباد اور صوبائی دارلحکومتوں، گلگت بلتستان اور آزاد کشمیر میں کنٹرول رومز قائم کر دیئے گئے ہیں اور فوکل پرسنز بھی نامزد کردئیے گئے ہیں اور موجودہ حالات کے پیش نظر نجی و سرکاری ہسپتالوں میں ایمرجنسی صورتحال کو مدنظر رکھتے ہوئے بیڈز اور وارڈ بھی مختص کردئیے گئے ہیں۔ اجلاس کو بتایا گیا کہ موجودہ ملکی حالات کو مدنظر رکھتے ہوئے اسلام آباد سمیت پورے ملک میں ایمبولینسز اور فائر فائٹرز 24/7 الرٹ ہیں ، اجلاس کو بتایا گیا کہ ملک بھر میں رضاکاروں کو متحرک کردیا گیا ہے جبکہ رضا کاروں کی تعداد میں زیادہ سے زیادہ اضافہ کرنے اورکسی بھی ایمرجنسی صورتحال سے نبرد آزما ہونے کیلئے بھر پور تیاری مکمل ہے۔ اسی طرح ملک بھر میں سول ڈیفنس اور دیگر صوبائی اداروں نے رضا کاروں کو انخلاء، آگ بجھانے اور ہنگامی صورتحال سے نمٹنے کیلئے تربیت دی گئی ہے جبکہ مزید افراد کو تربیت فراہم کی جارہی ہے ، اجلاس کو بتایا گیا کہ ضلعی انتظامیہ اور پولیس کی معاونت سے سیف سٹی کنٹرول روم مکمل طور پر فعال ہیں اور لمحہ بہ لمحہ صورتحال کی نگرانی کو یقینی بنایا جارہا ہے۔ اسی طرح اسلام آباد شہر اور پورے ملک میں کسی بھی ہنگامی صورت حال سے آگاہی کیلئے مختلف مقامات پر سائرن لگائے گئے ہیں۔ اس ضمن میں ہنگامی صورتحال کے پیش نظر رضاکاروں نے اسلام آباد سمیت ملک بھر کی بلند عمارات میں مشقی ڈرلز (موک) مکمل کرلی ہیں جبکہ مزید مشقوں کا عمل جاری رکھنے کی ہدایت بھی جاری کردی گئیں ہیں۔
اجلاس کو بریفننگ دیتے ہوئے بتایا گیا کہ کسی بھی ہنگامی صورتحال سے نمٹنے کیلئے مساجد میں اعلانات کے انتظامات بھی مکمل ہیں اور ایمرجنسی صورتحال کے بروقت رسپانس کے لئے فائر بریگیڈز کی گاڑیاں، فائر فائٹرز اور متعلقہ عملہ بھی مستعد اور متحرک ہے۔ اسی طرح قومی ایمرجنسی کے پیش نظر تمام صوبوں میں رضاکاروں کی تعداد میں مزید اضافہ جبکہ ان کو متحرک کرنے کی ہدایت بھی جاری کردی گئیں ہیں ، بریفننگ دیتے ہوئے اجلاس کو بتایا گیا کہ تمام صوبوں اور دیگر مقامات پر بلڈ ڈونرز کی لسٹیں تیار کی جارہی ہیں اور ہنگامی صورتحال سے نبردآزما ہونے کیلئے تمام اضلاع میں افسران کو ایمرجنسی ایڈوائزری بھی جاری کردی گئی ہے ، چیئرمین سی ڈی اے محمد علی رندھاوا نے کنٹرول روم، ہوم ڈیپارٹمنٹ، ریسکیو سمیت دیگر اداروں کے مابین مؤثر کوارڈینیشن کو یقینی بنانے کی ہدایت کی۔ انہوں نے کہا کہ شہریوں میں من گھڑت اور فیک نیوز کے حوالے سے جامع منصوبہ بندی اختیار کی جائے تاکہ شہریوں کو مکمل اور مصدقہ خبریں بروقت پہنچائی جائیں۔
چیئرمین سی ڈی اے نے ہدایت کی کہ سکولوں، کالجز اور یونیورسٹیوں کے طلباء و طالبات کو پورے ملک میں کسی بھی ہنگامی صورتحال سے نمٹنے کیلئے سول ڈیفنس کی مشقیں کروائی جائیں۔ چیئرمین سی ڈی اے ، چیف کمشنر اسلام آباد و ڈی جی سول ڈیفنس نے سول ڈیفنس کے تمام صوبائی دفاتر اور متعلقہ اداروں کو روزانہ کی بنیاد پر پراگرس رپورٹ پیش کرنے کی ہدایت کی۔ انہوں نے کہا کہ شہریوں کی جان اور املاک کا تحفظ ہماری اولین ترجیح ہے اور ہم سب ایک ٹیم ہیں۔ انہوں نے کہا کہ کسی بھی ہنگامی صورتحال سے نبرد آزما ہونے اور اس پر مکمل قابو پانے کیلئے تمام وسائل بروئے کار لائے جائیں گے
