اسلام آباد(سٹاف رپورٹر )انتہائی دکھ اور افسوس کے ساتھ اطلاع دی جاتی ہے کہ فیڈرل گورنمنٹ ایمپلائز ہاؤسنگ اتھارٹی (FGEHA) کے سینئر افسر(ڈائریکٹر لینڈ)، احسان الٰہی کو گزشتہ روز بلیو ایریا، اسلام آباد میں موٹر سائیکل سوار نامعلوم ملزمان نے ٹارگٹ کلنگ کا نشانہ بنایا۔ افسوسناک واقعے میں احسان الٰہی موقع پر ہی جامِ شہادت نوش کر گئے۔ احسان الٰہی کا نماز جنازہ بمقام جامعہ مسجد ریاض الجنہ، فٹبال گراؤنڈ نزد سروس روڈ (E) ، سیکٹر جی-10/4، اسلام آباد میں ادا کر دیا گیا۔ وفاقی وزیر ہاؤسنگ ریاض حسین پیرزادہ نے پمز ہسپتال کا دورہ کیا اور مقتول کے لواحقین سے ملاقات کر کے اظہار تعزیت کی۔
وفاقی وزیر داخلہ محسن نقوی نے واقعے کا نوٹس لیتے ہوئے آئی جی اسلام آباد سے رپورٹ طلب کر لی ہے۔ وزیر داخلہ نے قتل کی ہر پہلو کی تحقیقات اور ملزمان کی فوری گرفتاری کی ہدایت کی۔ محسن نقوی نے کہا کہ مقتول کے لواحقین کو انصاف کی فراہمی میں کوئی کسر اٹھا نہ رکھی جائے۔ پولیس اور تفتیشی ادارے واقعے کی تحقیقات میں مصروف ہیں، جبکہ پوسٹ مارٹم رپورٹ ابھی موصول ہونا باقی ہے۔ ادارہ مکمل تعاون کر رہا ہے تاکہ واقعے کے محرکات اور ذمہ داران کو جلد از جلد قانون کے کٹہرے میں لایا جا سکے۔
مرحوم احسان الٰہی ایک نہایت فرض شناس، دیانتدار اور سرگرم افسر تھے، جو پارک روڈ مارگلہ ارچرڈ ہاؤسنگ سکیم سمیت ہاؤسنگ اتھارٹی کے متعدد اہم منصوبوں پر انتہائی محنت، لگن اور خلوص سے کام کر رہے تھے۔ ان کی پیشہ ورانہ صلاحیت، جرات مندی، اور عوامی خدمت کے جذبے نے انہیں ادارے کے بہترین افسران میں نمایاں مقام دیا تھا۔ اس ناگہانی خبر پر سپریم کورٹ بار ایسوسی ایشن کے نمائندگان وکلا بھی صدمے میں ہیں۔ فیڈرل گورنمنٹ ایمپلائز ہاؤسنگ اتھارٹی کے ڈائریکٹر جنرل، افسران، اور تمام عملہ مرحوم کی ناگہانی شہادت پر گہرے دکھ اور افسوس کا اظہار کرتے ہیں۔
یہ سانحہ نہ صرف ہاؤسنگ اتھارٹی کے لیے ایک ناقابلِ تلافی نقصان ہے بلکہ اسلام آباد کے شہریوں اور تمام سرکاری اداروں کے لیے شدید صدمے کا باعث بنا ہے۔ ادارہ مرحوم کے اہلِ خانہ کے غم میں برابر کا شریک ہے اور دعاگو ہے کہ اللہ تعالیٰ مرحوم کے درجات بلند فرمائے، ان کی مغفرت کرے اور اہلِ خانہ کو صبرِ جمیل عطا فرمائے۔ مزید یہ کہ ہاؤسنگ اتھارٹی نے اس افسوسناک واقعے پر مکمل عدالتی اور انتظامی کارروائی کے لیے متعلقہ اداروں سے رابطہ کیا ہے تاکہ انصاف کے تمام تقاضے پورے کیے جا سکیں۔
