نئی دہلی ۔مس گرینڈ انٹرنیشنل 2024 میں حسن کے مقابلے کی فاتح بھارتی حسینہ ریچل گپتا نے پاکستان کی روما مائیکل کے ساتھ اپنی تصویر سوشل میڈیا پر شیئر کرتے ہوئے لکھا کہ ’میری پنجابی بہن‘، ‘سرحدیں ہمیں الگ کر سکتی ہیں، مگر وہ ہمارے مشترکہ رشتے کو متاثر نہیں کر سکتیں۔ریچل گپتا کے اس بیان پر سوشل میڈیا صارفین نے تبصرہ کیا کہ پیچیدہ تعلقات ہونے کے باوجود پاکستان اور بھارت کے عوام کے درمیان محبت ہر حد سے بڑھ کر ہے۔
گزشتہ ہفتے بنکاک میں منعقدہ مس گرینڈ انٹرنیشنل 2024 کے مقابلے میں پاکستان کی روما مائیکل اور بھارت کی ریچل گپتا کے درمیان فائنل ہوا، جسے بھارتی حسینہ ریچل گپتا نے جیت لیا۔مقابلہ جیتنے کے بعد ریچل گپتا نے انسٹاگرام پر ایک جذباتی پیغام لکھا، جس میں انہوں نے روما مائیکل کو اپنی ’پنجابی بہن‘ قرار دیتے ہوئے ان سے اپنی محبت کا اظہار کیا۔
انسٹاگرام پر اپنی پوسٹ میں ریچل گپتا نے کہا، “روما، جب میں آپ کی ہمت اور خوبصورتی کے بارے میں سوچتی ہوں تو میرا دل فخر سے بھر جاتا ہے۔ آپ کے ساتھ مقابلہ کرنا میرے لیے خوشی کی بات تھی، یہ بالکل ایسے ہی تھا جیسے گھر سے دور گھر کی تلاش کرنا۔انہوں نے مزید لکھا، “روما، آپ کی مہربانی، لگن اور حوصلہ ہم سب کے لیے مثال ہیں اور مجھے ان تمام چیزوں پر فخر ہے جن پر آپ نے خود کو قابو پایا۔”
ریچل گپتا نے یہ بھی کہا کہ سرحدیں ہمیں جدا کر سکتی ہیں، لیکن وہ ہمارے تعلق کو نہیں توڑ سکتیں۔ ہم ایک ہی خاندان سے ہیں، آپ ہمیشہ میرے بہترین دوست رہیں گی، بھارت میں آپ کے لیے دروازے ہمیشہ کھلے رہیں گے۔اپنا سر بلند رکھیں، روما، کیونکہ آپ اکیلی نہیں ہیں۔ ہم ایک ساتھ ہیں، کیونکہ جو چیز ہمیں تقسیم کرتی ہے وہ اس سے بڑی نہیں ہے جو ہمیں متحد کرتی ہے!
