ممبئی (مانیٹرنگ ڈیسک ) بھارتی فلم سو لانگ ویلی کے پروڈیوسر کرن سنگھ ایک نئے تنازع کا شکار ہو گئے ہیں، جب معروف ماڈل و اداکارہ روچی گجر نے ان پر 23 لاکھ روپے کی دھوکہ دہی کا الزام عائد کر دیا بھارتی میڈیا رپورٹس کے مطابق، ممبئی پولیس کا کہنا ہے کہ روچی گجر نے جمعہ کی رات فلم کے پریمیئر کے دوران اسٹیج پر کرن سنگھ کو چپل دے ماری، جس کے بعد اس واقعے کی ویڈیوز سوشل میڈیا پر وائرل ہوگئیں۔پولیس کے مطابق، اس واقعے سے ایک دن قبل اوشیوارا تھانے میں روچی کی درخواست پر ایف آئی آر درج کی جا چکی تھی، جس میں کرن سنگھ پر بھارتی پینل کوڈ کی متعدد دفعات کے تحت مقدمہ درج کیا گیا ہے۔
ماڈل روچی گجر کا مؤقف ہے کہ کرن سنگھ نے ان سے 23 لاکھ روپے اس وعدے پر لیے تھے کہ انہیں ایک ٹی وی فلم پروجیکٹ میں کردار، منافع میں حصہ اور اسکرین کریڈٹ دیا جائے گا۔ تاہم، ان کے مطابق یہ وعدے پورے نہیں کیے گئے، جس پر انہوں نے قانونی کارروائی کا فیصلہ کیا ممبئی پولیس کا کہنا ہے کہ معاملے کی تحقیقات شروع کر دی گئی ہیں اور شواہد جمع کیے جا رہے ہیں۔ پولیس نے یقین دہانی کرائی ہے کہ معاملے میں قانون کے مطابق پیش رفت کی جائے گی۔
