کیپ ٹائون۔پاکستان کی بہادر کوہ پیما، سمر خان، نے ایک اور سنگِ میل عبور کرتے ہوئے جنوبی امریکہ کی بلند ترین چوٹی، ماؤنٹ اکنکاگوا، سر کرلی ہے۔
ارجنٹائن میں واقع اس چوٹی کی بلندی 6,961 میٹر ہے، اور سمر خان نے شدید سردی، طاقتور ہواؤں، اور سخت ترین حالات کا مقابلہ کرتے ہوئے اس کو فتح کیا۔
اپنی کامیابی پر اظہارِ خیال کرتے ہوئے، سمر خان نے کہا کہ یہ کارنامہ ان کے لیے صرف ایک چڑھائی نہیں بلکہ ایمان، عزم، اور استقامت کا عملی مظاہرہ ہے۔ انہوں نے اپنی کامیابی کو اللہ تعالیٰ کی کرم نوازی اور اپنے خاندان، دوستوں، اور مداحوں کی دعاؤں کا نتیجہ قرار دیا۔
ماؤنٹ اکنکاگوا دنیا کی بلند ترین چوٹیوں میں شمار کی جاتی ہے اور ایشیا کے باہر سب سے بلند پہاڑ ہے۔ اس کا دشوار گزار راستہ، غیر متوقع موسم، اور انتہائی بلندی پر چڑھائی کوہ پیماؤں کے لیے کڑا امتحان ہے۔ لیکن سمر خان نے اپنی بے مثال لگن اور حوصلے سے یہ مشکل چیلنج قبول کیا اور سرخرو ہوئیں۔
یہ کامیابی ان کے کارناموں کی فہرست میں ایک اور اضافہ ہے۔ 2024 میں، وہ یورپ کی بلند ترین چوٹی، ماؤنٹ ایلبرس، پر سنوبورڈنگ کرنے والی پہلی پاکستانی خاتون بنیں۔ اس سے پہلے، وہ کے ٹو کے بیس کیمپ تک پہاڑی بائیک پر پہنچنے والی پہلی خاتون بھی رہ چکی ہیں۔
سمر خان نے اپنے انسٹاگرام اکاؤنٹ پر اس سفر کی تصاویر اور ویڈیوز شیئر کیں، جن میں مہم کے دوران پیش آنے والے چیلنجز اور جذباتی لمحات کو اجاگر کیا گیا۔
سمر خان کا یہ جذبہ اور کامیابیاں نہ صرف پاکستانی خواتین بلکہ دنیا بھر کے نوجوانوں کے لیے مشعلِ راہ ہیں۔
