پرتگال کے اسٹار فٹبالر کرسٹیانو رونالڈو نے سعودی پرو لیگ میں ایک اور نیا سنگ میل عبور کرلیا ہے، جب انہوں نے النصر کی جانب سے کھیلتے ہوئے الراید کے خلاف اہم میچ میں 2-1 سے فتح دلائی۔ اس میچ میں رونالڈو نے ایک گول اسکور کیا اور ایک اسسٹ بھی دیا۔
اس فتح کے ساتھ ہی رونالڈو دنیا کے واحد فٹبالر بن گئے ہیں جنہوں نے مختلف کلبز کی نمائندگی کرتے ہوئے اب تک 700 فتوحات اپنے نام کی ہیں۔ ان کے علاوہ کوئی فٹبالر یہ شاندار کارنامہ سرانجام نہیں دے سکا۔
رونالڈو نے النصر کے لیے اب تک 94 میچز میں 85 گول کیے ہیں، جو ان کی شاندار فارم اور مہارت کو ظاہر کرتا ہے۔
اس کے علاوہ، رونالڈو کی سعودی پرو لیگ میں کامیاب آمد کی خبروں میں یہ بھی شامل ہے کہ وہ جلد ایک منٹ میں 300 پاؤنڈ کمائیں گے، جس کے بعد ان کا نیا سعودی معاہدہ دنیا کے سب سے مہنگے ایتھلیٹ ہونے کی حیثیت کو مزید مستحکم کر دے گا۔
کرسٹیانو رونالڈو کو النصر کی جانب سے 167.9 ملین پاؤنڈ کا معاہدہ دیا جانے کا امکان ہے۔ 39 سالہ فٹبالر نے جنوری 2023 میں النصر کو جوائن کیا تھا اور اس وقت انہیں 164 ملین پاؤنڈ فی سیزن میچز کے لیے اور اضافی 49 ملین پاؤنڈ آف دی فیلڈ ایونٹس کیلیے ملے تھے، جس کے بعد وہ اب دنیا کے سب سے زیادہ معاوضہ حاصل کرنے والے کھلاڑی بن جائیں گے۔
رونالڈو کی سعودی پرو لیگ میں کامیاب کارکردگی اور معاہدے نے انہیں عالمی فٹبال کے ایک اور اہم مقام پر پہنچا دیا ہے۔
