اسلام آبا د (کرائم رپورٹر)آ ئی جی اسلام آباد سید علی ناصر رضوی کی خصوصی ہدایت پر بڑے پیمانے پر محکمانہ ترقیاں 4 انسپکٹرز کو ڈی ایس پی کے عہدے پر،62 ہیڈ کانسٹیبلز کو اے ایس آئی کے عہدے پر،200سے زائد کانسٹیبلز کوہیڈ کانسٹیبل کے عہدے پر ترقی دی جائے گی،تمام افسران دلجمعی اور پیشہ ورانہ انداز سے اپنے فرائض منصبی سرانجام دیں .
تفصیلات کے مطابق انسپکٹر جنرل آف پولیس اسلام آباد سید علی ناصر رضوی کی خصوصی دلچسپی اور احکامات پر اسلام آباد پولیس میں بڑے پیمانے پر محکمانہ ترقیوں کا آغاز کر دیا گیا ہے،اس سلسلے میں آ ئی جی اسلام آباد کی خصوصی ہدایت پر محکمانہ پروموشن کمیٹی نے خالی سیٹوں پر میرٹ اور شفافیت پر پروموشن کے سلسلے میں مختلف اجلاسوں کا انعقاد کیا،جس میں سینئر افسران نے معیار پر پورا اترنے والے مختلف رینکس کے افسران کے محکمانہ ریکاڈز اور دیگر پیشہ وارانہ صلاحیتوں کا جائزہ لیا،جس کے تحت4 انسپکٹرز کو ڈی ایس پی کے عہدوں پر،62 ہیڈ کانسٹیبلز کو اے ایس آئی کے عہدوں پر اور200سے زائد کانسٹیبلز کوہیڈ کانسٹیبل کے عہدوں پر ترقی دی جائے گی .
آئی جی اسلام آباد نے کہا کہ محکمانہ ترقی ذمہ داریوں میںاضافے اور اعتماد کی عکاس ہے ،جبکہ ترقی ہر پولیس افسر کا بنیادی حق ہے،انہوں نے مزید کہا کہ تمام افسران دلجمعی اور پیشہ ورانہ انداز سے اپنے فرائض منصبی سرانجام دیں ،میں امید کرتا ہوں افسران اپنے فرائض منصبی خوش اسلوبی اور ایمانداری کے ساتھ سر انجام دیں گے اور اس شہیدوں اور غازیوں کے محکمہ کی نیک نامی کےلئے اپنے فرائض پوری توانائی اور مستعدی سے ادا کریں گے، انہوں نے مزید کہا کہ پولیس فورس کی ویلفئیر میری اولین ترجیحات میں شامل ہیں،جبکہ تمام محکمانہ ترقی کے کورس پاس کرنے والے افسران کو ان کی سنیارٹی کے مطابق خالی سیٹوں پر میرٹ اور شفافیت پر ترقی دی جائے گی اور یہ سلسلہ تمام خالی سیٹیں مکمل ہونے تک جاری رہے گا.
