اسلام آباد (کرائم رپورٹر)اسلام آباد پولیس کے زیر اہتمام فرینڈز آف پولیس پروگرام کے تحت وفاقی دارلحکومت کی نمایاں یونیورسٹیز کے 100طلباءنے انٹرنشپ پروگرام مکمل کر لیا،ہمارے لئے آپ کی ٹریننگ مکمل کرنا ایک اہمیت کا حامل ہے،میرے لئے سب سے اہم اسکول کالجز تک جانا اور بہتر معاشرے کے لئے طلباءکی ذہن سازی کرناہے،چیف ٹریفک آفیسر اسلام آباد محمد سرفراز ورک
تفصیلات کے مطابق انسپکٹر جنرل آف پولیس اسلام آباد سید علی ناصر رضوی کے خصوصی احکامات کی روشنی میں اسلام آباد پولیس نے شہریوں کوٹریفک قوانین اور روڈ سیفٹی کے متعلق آگاہی فراہم کرنے کیلئے خصوصی فرینڈآف پولیس انٹرن شپ پروگرام کا آغاز کررکھا ہے.
اس سلسلے میں اسلام آبادپولیس کی جانب سے جاری پروگرام کے تحت وفاقی دارلحکومت کی نمایاں یونیورسٹیز کے 100طلباءنے انٹرنشپ مکمل کرلی،اس سلسلے میں ٹریفک پولیس لائنز ہیڈکوارٹرز فیض آبادمیں ایک پروقار تقریب کا انعقاد کیا گیا،چیف ٹریفک آفیسر محمد سرفراز ورک نے تقریب میں بطور مہمان خصوصی شرکت کی، اس موقع پر یونیورسٹیزکے طلباءاور اسلام آباد پولیس ایجوکیشن ٹیم کے ممبران شامل تھے،سی ٹی او اسلام آباد محمد سرفراز ورک نے کہا کہ ہمارے لئے آپ کی ٹریننگ مکمل کرنا ایک اہمیت کا حامل ہے،میرے لئے سب سے اہم اسکول کالجز تک جانا اور بہتر معاشرے کے لئے طلباءکی ذہن سازی کرناہے،پولیس کے لئے عوامی رائے بدلنا انتہائی مشکل عمل ہے،ہم اپنے پراسیس اور سروسز عوام کے سامنے رکھ رہے ہیں تاکہ عوام کو پتہ چلے پولیس کیا ہے،میں بلند و بالا دعوﺅں پر یقین نہیں رکھتا بلکہ عملی طور پر7 /24 کام کررہے ہیں.
انہوں نے مزید کہاکہ عوام کی خدمت کرنے والے اللہ کی طرف سے منتخب ہوتے ہیں،مشکل وقت میں سب سے پہلا ردعمل دینے والا محکمہ پولیس ہے،بدلتے دور کے ساتھ پولیس کوںعصر حاضر کے تقاضوں سے ہم آہنگ کررہے ہیں،اسلام آباد پولیس شہداءکے خون کی وارث ہے،وردی کسی بھی رنگ کی ہو ہمارا عہد ایک ہی ہے،ہم نے آپ سے وہ تعلق بنایا ہے جو دائمی ہے،پولیس کلچر مثبت عناصر پر مشتمل ہے اس سے منفی عنصر کو ختم کرنا ہے،انہوں نے مزید کہا کہ والنٹیر ان پولیس اور فرینڈز آف پولیس کا کردار ایک ہی ہے جس میں جرائم کی بیخ کنی میں عوامی اطلاع سب سے اہم ہے،آئیں ہمارا حصہ بنیں اور مل کر عوامی خدمت کریں ،تقریب کے اختتام پر انہوں نے کہا کہ اسلام آباد پولیس مستقبل میں بھی اس طرح کے پروگرام کا انعقاد جاری رکھے گی،تقریب کے اختتام پر طلباءمیں تعریفی سرٹیفکیٹس اور انعامات بھی تقسیم کئے گئے
