اسلام آبا د (کرائم رپورٹر )ڈی آئی جی اسلام آباد محمد جواد طارق نے فرائض منصبی کی ادائیگی میں بہترین کارکردگی کا مظاہرہ کرنے والے پولیس افسران کو نقد انعامات وتعریفی اسناد سے نوازا،اسی کے ساتھ انہوں نے اپنے دفتر میں کھلی کچہری کے دوران شہریوں کے مسائل سنے اورافسران کو شہریوں کے مسائل کے فوری حل کیلئے احکامات بھی جاری کئے۔
تفصیلات کے مطابق ڈپٹی انسپکٹر جنرل آف پولیس اسلام آباد محمد جو اد طا رق نے فرائض کی انجام دہی کے دوران بہتر ین کارکردگی کامظاہرہ کرنے والے پولیس افسران و جوانوں میں تعریفی اسناد اور نقد انعامات تقسیم کئے،اس موقع پر انہوں نے کہا کہ ان پولیس افسران نے جانفشانی اور بہادری سے اپنے فرائض منصبی سرانجام دیتے ہوئے سنگین جر ائم میں ملوث ملزمان کی گرفتار ی عمل میں لا ئی، انہوں نے مزید کہا کہ پولیس افسران کی محنت اور قربا نیاں قابل تحسین ہیں ان کی کا وشیں عوام کے تحفظ اور امن وامان کے قیام میں سنگ میل کی حیثیت رکھتی ہیں.
اسلام آباد پولیس کا وقار ان افسران کی بدولت ہے جو ایمانداری، خلوصِ نیت اور پیشہ ورانہ عزم کے ساتھ ہر چیلنج کا سامنا کرتے ہیں، انہو ں نے مزید کہا کہ بہادری،تہذیب اور شفافیت اسلام آباد پولیس کے امتیازی نشان ہونے چاہیں، تمام افسران جانفشانی اور بہادری سے اپنے فرائض منصبی سرانجام دیں، آپ سب لوگ ایک بہترین پولیس فورس کا حصہ ہیں، آپ کا ہر کام قومی و بین الاقوامی سطح پر اجاگر ہوتا ہے،اس موقع پر تمام افسران نے تعریفی اسناد اور انعامات کے حصول کو قابل ستائش قرار دیا، جبکہ ڈی آئی جی اسلام آباد محمد جواد طارق نے اپنے دفتر میںکھلی کچہری کے دوران شہریوں کے مسائل بھی سنے ،اس موقع پرانہوں نے افسران کو شہریوں کے مسائل کے فوری حل کیلئے احکامات بھی جاری کئے.
انہوں نے کہا کہ شہری اپنے مسائل کے حل کےلئے ”آئی جی پی شکایت سیل1715- ”پر بھی اپنی شکایات و مسائل درج کرواسکتے ہیں،جبکہ اسلام آباد کا کوئی بھی شہری ان کھلی کچہریوں میں کھل کر اپنے مسائل بیان کرسکتا ہے،اسلام آباد پولیس کی اس عوامی رابطہ مہم کا مقصد شہریوں کے مسائل ان کے دہلیز پر حل کرنا ہے.
