اسلام آباد (ویب ڈیسک) جمہوریہ ازبکستان کے صدر شوکت مرزیایوف نے پانچویں تاشقند انٹرنیشنل انویسٹمنٹ فورم کے افتتاحی اجلاس سے خطاب کرتے ہوئے ملک کی سرمایہ کاری پر مبنی ترقی کے نئے مرحلے کی اہم ترجیحات پر روشنی ڈالی اور اقتصادی اصلاحات کے تسلسل کے عزم کا اعادہ کیا۔
فورم میں مختلف ممالک کے اعلیٰ حکام، بین الاقوامی مالیاتی اداروں، غیر ملکی بینکوں، عالمی کمپنیوں، سرمایہ کاری فنڈز اور کاروباری برادری کے نمائندوں نے شرکت کی، شرکاء میں باجرام بیگاج، میخائل مشوستن، علی اسدوف، الیگزینڈر ترچن، اولژاس بیکتینوف، عادل بیک کاسمالییف اور قاہر رسول زادہ سمیت متعدد اہم شخصیات شامل تھیں۔
صدر مرزیایوف نے اپنے خطاب میں کہا کہ ازبکستان سرمایہ کاری، صنعتی ترقی، جدید ٹیکنالوجی، توانائی، بنیادی ڈھانچے اور نجی شعبے کے فروغ کو قومی ترقی کی حکمتِ عملی کا مرکزی حصہ بنا رہا ہے۔ انہوں نے غیر ملکی سرمایہ کاروں کے لیے سازگار کاروباری ماحول کی فراہمی اور بین الاقوامی شراکت داری کو مزید مضبوط بنانے کے عزم کا اظہار کیا۔
فورم میں دلما روسیف سمیت مختلف کثیرالجہتی مالیاتی اداروں اور عالمی کاروباری تنظیموں کے نمائندوں نے بھی شرکت کی۔ شرکاء نے ازبکستان میں سرمایہ کاری کے امکانات، علاقائی اقتصادی تعاون اور پائیدار ترقی کے مواقع پر تبادلۂ خیال کیا۔
تاشقند انٹرنیشنل انویسٹمنٹ فورم کا مقصد ازبکستان اور پورے خطے میں سرمایہ کاری کے مواقع کو اجاگر کرنا، اقتصادی تعاون کو فروغ دینا اور عالمی سرمایہ کاروں کے ساتھ طویل المدتی شراکت داری کو مضبوط بنانا ہے، ماہرین کے مطابق فورم نہ صرف ازبکستان کی اقتصادی پالیسیوں کو عالمی سطح پر متعارف کرانے میں مددگار ثابت ہوگا بلکہ خطے میں تجارت، سرمایہ کاری اور صنعتی تعاون کے نئے مواقع بھی پیدا کرے گا۔
