کراکس (ویب ڈیسک) وینزویلا میں مبینہ طور پر آنے والے طاقتور زلزلوں نے بڑے پیمانے پر تباہی مچانے کی اطلاعات سامنے آئی ہیں، تاہم حکام اور عالمی اداروں کی جانب سے ابتدائی تفصیلات کی مکمل تصدیق جاری ہے۔
امریکی جیولوجیکل سروے (USGS) کے حوالے سے سامنے آنے والی رپورٹس کے مطابق وینزویلا میں پہلا زلزلہ 7.1 شدت کا ریکارڈ کیا گیا، جس کے چند منٹ بعد 7.5 شدت کے ایک اور جھٹکے نے صورتحال کو مزید سنگین بنا دیا۔ زلزلہ مقامی وقت کے مطابق شام 6 بجے کے قریب آیا، جس کے نتیجے میں کئی شہروں میں عمارتیں لرز اٹھیں۔
رپورٹس میں دعویٰ کیا جا رہا ہے کہ دارالحکومت کراکس سمیت مختلف علاقوں میں متعدد عمارتیں منہدم ہو گئی ہیں اور بڑی تعداد میں افراد کے ملبے تلے دبے ہونے کا خدشہ ظاہر کیا جا رہا ہے۔ مقامی میڈیا کے مطابق کچھ علاقوں میں امدادی سرگرمیاں شروع کر دی گئی ہیں۔
وینزویلا کی قائم مقام صدر ڈیلسی روڈریگز نے زلزلے کو ایک قومی سانحہ قرار دیتے ہوئے کہا ہے کہ کئی عمارتوں کو شدید نقصان پہنچا ہے، تاہم جانی نقصان کے اعداد و شمار کی حتمی تصدیق ابھی جاری ہے۔
دوسری جانب غیر مصدقہ اطلاعات میں دعویٰ کیا جا رہا ہے کہ مائی کیٹیا ایئرپورٹ سمیت متعدد بنیادی تنصیبات کو بھی نقصان پہنچا ہے، جبکہ ہلاکتوں اور زخمیوں کی بڑی تعداد سامنے آنے کی بات کی جا رہی ہے۔ ان اعداد و شمار کی آزاد ذرائع سے تصدیق نہیں ہو سکی۔
اسی دوران امریکی ریاست کیلیفورنیا کے شمالی علاقوں میں بھی 5.6 شدت کا زلزلہ ریکارڈ کیا گیا، جس کے بعد تقریباً 10 لاکھ افراد کو الرٹ جاری کیے جانے کی اطلاعات ہیں۔
مزید یہ بھی کہا جا رہا ہے کہ امریکی جیولوجیکل سروے نے وینزویلا میں ممکنہ طور پر بڑے پیمانے پر جانی نقصان کا خدشہ ظاہر کیا ہے، تاہم یہ اعداد و شمار ابتدائی اندازوں پر مبنی ہیں اور صورتحال واضح ہونے میں وقت لگ سکتا ہے۔
امریکی حکام کی جانب سے وینزویلا میں صورتحال پر نظر رکھنے اور ممکنہ امداد کے حوالے سے اقدامات کی اطلاعات بھی سامنے آ رہی ہیں، تاہم سرکاری سطح پر تفصیلی بیان کا انتظار کیا جا رہا ہے۔
