راولپنڈی(کرائم رپورٹر)ڈویژنل انٹیلی جنس کمیٹی کی ہدایات پر عمل کرتے ہوے راولپنڈی ڈویلپمنٹ اتھارٹی ٹاسک فورس نے غیر قانونی ہاؤسنگ سکیموں کے خلاف کارروائیاں تیز کر دی ہیں، آرڈی اے انفورسمنٹ سکواڈ نے اسسٹنٹ کمشنر گوجر خان کے تعاون سے ایک غیر قانونی ہاؤسنگ سکیم ہیون ویلی جو موضع سہنگ مندرہ چکوال روڈ راولپنڈی پر واقع ہے کے خلاف آپریشن کرتے ہوے باؤنڈری والز کو مسمار کر دیا ہے، ترجمان آر ڈی اے کے مطابق آپریشن کی نگرانی کمشنر راولپنڈی ڈویژن محمد عبدالعامر خٹک انجینئر، ڈائریکٹر جنرل آر ڈی اے کنزہ مرتضی، ایڈیشنل ڈی جی آرڈی اے، ڈپٹی کمشنر راولپنڈی اور سی پی او راولپنڈی کر رہے ہیں.
ڈی جی آر ڈی اے کنزہ مرتضیٰ نے کہا کہ کمشنر راولپنڈی کی ہدایات پر دھوکہ دہی کی روک تھام اور شہریوں کو استحصال سے بچانے کے لیے غیر قانونی ہاؤسنگ سوسائٹیوں کے خلاف کریک ڈاؤن بھرپور طریقے سے جاری رہے گا۔ انہوں نے کہا کہ ہاؤسنگ سکیموں کے مالکان کی جانب سے زمینوں پر غیر قانونی قبضوں سے متعلق عوامی شکایات کو سنجیدگی سے لیا جا رہا ہے اور زمینوں پر زبردستی قبضہ کرنے والوں کے خلاف سخت کارروائی عمل میں لائی جائے گی۔
آرڈی اے عوام الناس کو مطلع کرنے کے لیے باقاعدگی سے پریس ریلیز جاری کرتا ہے اور شہریوں کو غیر قانونی ہاؤسنگ سکیموں میں سرمایہ کاری سے گریز کرنے کا مشورہ دیتا ہے۔ اس کے علاوہ عوام الناس کی حوصلہ افزائی کی جاتی ہے کہ وہ آر ڈی اے ویب سائٹ (www.rda.gop.pk) دیکھیں اور صرف منظور شدہ ہاؤسنگ سکیموں سے خرید و فروخت کریں۔ غیر قانونی اشتہارات، بکنگ اور ڈیویلپمنٹ کو روکنے کے لیے سابقہ وارننگ کے باوجود مذکورہ ہاؤسنگ سکیموں کے مالکان نے قواعد و ضوابط کی خلاف ورزی کرتے ہوئے بکنگ دفاتر کا کام جاری رکھا ہوا تھا۔ مشترکہ آپریشن ٹیم میں آر ڈی اے، اے سی گوجر خان خضر ظہور گورایہ اور تھانہ مندرہ کے اہلکار شامل تھے۔ ٹیم کے کلیدی ارکان میں ڈپٹی ڈائریکٹر ایڈمن آر ڈی اے افتخار علی، اسسٹنٹ ڈائریکٹر پلاننگ آر ڈی اے شیزا بٹ، آر ڈی اے سکیم انسپکٹرز اور ٹیم کے دیگر ارکان شامل تھے۔
