اسلام آباد(کرائم رپورٹر )ایف آئی اے امیگریشن اسلام آباد نے بڑی کارروائی کرتے ہوئے جعلی سفری دستاویزات کے ذریعے بیرون ملک جانے کی کوشش ناکام بنا دی۔ کارروائی کے دوران خاتون سمیت تین مسافروں کو آف لوڈ کر کے گرفتار کر لیا گیا ، ایف آئی اے کے مطابق گرفتار ہونے والوں میں سلمان خان، بادشاہ خان اور آرمغان بلخی نامی خاتون شامل ہیں۔ سلمان خان اور بادشاہ خان کا تعلق بالترتیب سوات اور دیر سے ہے، جبکہ خاتون آرمغان بلخی افغان شہری ہیں۔
سلمان خان فلائٹ نمبر PF718 کے ذریعے عمرے کے ویزے پر سعودی عرب روانہ ہو رہا تھا، تاہم چیکنگ کے دوران اس کے پاسپورٹ پر سربیا کا جعلی ویزا برآمد ہوا۔ دوسری جانب بادشاہ خان بحرین جانے والی پرواز PK187 پر سوار ہونے والا تھا، مگر اس کے موبائل فون سے اٹلی کا جعلی ریزیڈنٹ کارڈ برآمد کر لیا گیا۔ مزید تحقیقات سے معلوم ہوا کہ وہ 2023 میں پاکستان سے آذربائیجان اور بعد ازاں لیبیا گیا تھا، جہاں سے غیر قانونی طریقے سے یورپ جاتے ہوئے گرفتار ہوا اور رواں سال ہی پاکستان ڈیپورٹ کیا گیا۔
تیسری ملزمہ آرمغان بلخی فلائٹ PK749 کے ذریعے فرانس جا رہی تھی، مگر امیگریشن حکام کو اس کے پیش کردہ سوئس ریزیڈنٹ کارڈ پر شبہ ہوا۔ تفتیش پر یہ کارڈ جعلی نکلا۔ ملزمہ کا تعلق افغانستان سے ہے ، ایف آئی اے امیگریشن اسلام آباد نے تینوں ملزمان کو ابتدائی کارروائی کے بعد مزید تحقیقات اور قانونی کارروائی کے لیے اینٹی ہیومن ٹریفکنگ سرکل اسلام آباد کے حوالے کر دیا ہے ، حکام کے مطابق جعلی دستاویزات کے ذریعے بیرون ملک جانے کی کوشش کرنے والے عناصر کے خلاف زیرو ٹالرنس کی پالیسی اپنائی گئی ہے، اور ایسے جرائم میں ملوث افراد کے خلاف سخت قانونی کارروائی عمل میں لائی جائے گی۔
