اسلام آباد (سٹاف رپورٹر )وزیراعظم محمد شہباز شریف نے سوات کے علاقے مٹہ میں انسداد پولیو ٹیم پر دہشتگرد حملے کی شدید مذمت کرتے ہوئے انسداد پولیو مہم پولیو کے مکمل خاتمے تک جاری رکھنے کے عزم کا اظہار کیا ہے۔
منگل کو وزیراعظم آفس کے میڈیا ونگ کی طرف سے جاری بیان کے مطابق وزیراعظم نے انسداد پولیو ٹیم کی حفاظت پر مامور لیویز اہلکار عبد الکبیر کی شہادت پر افسوس کا اظہار کرتے ہوئے شہید کے لیے مغفرت اور لواحقین کے لیے صبر و استقامت کی دعا کی ، انہوں نے کہا کہ پولیو کے خاتمے کی اہم عوامی خدمت کرنے والوں پر دہشتگرد حملہ ناقابلِ برداشت ہے، حکومت ملک سے پولیو کے مکمل خاتمے کے لیے پر عزم ہے، دہشتگردوں کی جانب سے اس قسم کی مزاحمت کے باوجود انسداد پولیو مہم مکمل تحریک کے ساتھ جاری ہے اور پولیو کے مکمل خاتمے تک جاری رہے گی۔
