اسلام آباد (کرائم رپورٹر)اسلام آباد کیپیٹل ٹیریٹری (آئی سی ٹی) پولیس نے بین الاقوامی یوم خواتین کے موقع پر اپنی خواتین افسران اور اہلکاروں کو خراج تحسین پیش کیا اور امن وامان برقرار رکھنے اور کمیونٹی کی خدمت میں ان کے اہم کردار کا اعتراف کیاہے .ترجمان آئی سی ٹی نے کیپیٹل نیوز پوائنٹ کو بتایا کہ اسلام آباد پولیس کے انسپکٹر جنرل (آئی جی پی) سید علی ناصر رضوی نے کہا کہ اسلام آباد پولیس میں خدمات انجام دینے والی خواتین فورس کے لیے فخر کا باعث اور قیمتی اثاثہ ہیں۔
انہوں نے کہا کہ خواتین پولیس اہلکار مختلف شعبوں میں مرد افسران کے شانہ بشانہ اپنی ڈیوٹیاں انجام دے رہی ہیں اور قانون نافذ کرنے اور جرائم کی روک تھام میں نمایاں کردار ادا کر رہی ہیں۔آئی جی نے کہا کہ اسلام آباد پولیس نے خواتین کے تحفظ اور سہولیات کے لیے موثر اقدامات کیے ہیں، اس کے علاوہ ویمن پولیس اسٹیشن اور ڈیجیٹل پولیس اسٹیشن فعال طور پر خواتین شہریوں کو فوری امداد فراہم کر رہے ہیں۔سید علی ناصر رضوی نے کہا کہ خواتین کو محفوظ اور پراعتماد ماحول فراہم کرنا اسلام آباد پولیس کی اولین ترجیح ہے۔
انہوں نے کہا کہ خواتین افسران پولیس فورس میں شاندار پیشہ ورانہ صلاحیتوں کا مظاہرہ کر رہی ہیں اور عوامی اعتماد کو مضبوط کرنے میں اہم کردار ادا کر رہی ہیں۔آئی جی پی سید علی ناصر رضوی نے اسلام آباد پولیس کے شہدا اور غازیوں کی بہادر ماؤں، بہنوں اور بیٹیوں کو بھی خراج تحسین پیش کیا اور ان کی قربانیوں اور استقامت کو سراہا۔انہوں نے زور دیا کہ خواتین کے لیے برابر مواقع سماجی ترقی کے لیے ناگزیر ہیں اور معاشرے میں خواتین کا مثبت کردار قومی ترقی کے لیے انتہائی اہم ہے۔ آئی جی پی نے دہرایا کہ اسلام آباد پولیس خواتین افسران کی پیشہ ورانہ خدمات کو مزید بہتر بنانے کے لیے ان کی حمایت اور حوصلہ افزائی جاری رکھے گی تاکہ پولیسنگ اور عوامی خدمت میں ان کا کردار مزید موثر ہو سکے۔
