راولپنڈی(کرائم رپورٹر )چیف ٹریفک آفیسر راولپنڈی فرحان اسلم کے احکامات پر انچارج ٹریفک ایجوکیشن ونگ کا اپنی ٹیم کے ہمراہ تعلیمی اداروں میں سٹوڈنٹس اور ٹیچرز کو روڈ سیفٹی و ٹریفک قوانین سے متعلق آگاہی فراہم کرنے کا سلسلہ جاری۔آگاہی مہم کے دوران سرکاری سکول کی طالبات کو زیبرا کراسنگ، سٹاپ لائن،ٹریفک سگنل،سیٹ بیلٹ،ہیلمٹ کا استعمال اور دیگر ٹریفک قوانین کے متعلق عملی طور پر آگاہی فراہم کی گئی۔
اس موقع پر چیف ٹریفک آٖفیسر راولپنڈی فرحان اسلم کا کہنا تھا کہ ہمارے بچے اس ملک کا مستقبل ہیں انکی اچھی تربیت و ترقی کیلئے دنیاوی تعلیم کے ساتھ ٹریفک ایجوکیشن بھی ضروری ہے اس سے ہر بچہ یہ جان سکے گا کہ روڈ پر اسے کیا کرنا ہے اور کس طرح اپنے آپ اور دوسروں کو روڈحادثات سے محفوظ رکھنا ہے۔ان کا مزید کہنا تھا کہ ٹریفک قوانین کو سمجھ کر ان پر ذمہ داری کے ساتھ عمل پیرا ہونا مہذب قوم کی پہچان ہے۔ شاہراہوں پر ٹریفک سائن بورڈ ہمارے محافظ ہیں انکو سمجھ کر ان کی پابندی محفوظ سفر کی ضمانت ہے کیونکہ زندگی انمول ہے غیر ذمہ داری کا مظاہرہ کر کے زندگی کو روڈ حادثات کی نظر نہیں کرنا چاہیے۔
