اسلام آباد ( سپیشل رپورٹر ) بجلی کے بل بروقت ادا کرنے کے باوجود صارفین پر بھاری لیٹ فیس عائد کیے جانے کا انکشاف شہریوں کا شدید احتجاج۔ ذرائع کے مطابق معاملے میں مبینہ طور پر اسلام آباد الیکٹرک سپلائی کمپنی (Islamabad Electric Supply Company) اور Allied Bank کے درمیان کوآرڈینیشن کے مسائل نمایاں ہوئے ہیں۔
تفصیلات کے مطابق مئی تا جنوری کے بجلی کے بل جاری ہوئے جنہیں متعدد صارفین نے 26 جنوری کو بینک کے ذریعے بروقت ادا کیا۔ تاہم فروری کے بل موصول ہونے پر صارفین کو حیرت کا سامنا کرنا پڑا جب ان بلوں میں لاکھوں روپے تک کی لیٹ فیس اور جرمانے شامل تھے۔ متاثرہ شہری بلوں کی درستگی کے لیے دفاتر پہنچے تو متعلقہ حکام نے ذمہ داری بینک پر عائد کرتے ہوئے مؤقف اختیار کیا کہ اگرچہ بل 26 جنوری کو جمع ہوئے، مگر رقم کمپنی کے اکاؤنٹ میں 27 جنوری کو پہنچی، جو مقررہ تاریخ کے بعد تھی۔
حکام کے مطابق تاخیر بینکنگ پراسیسنگ کے باعث ہوئی، لہٰذا کمپنی کی جانب سے جرمانہ عائد کرنا قواعد کے مطابق ہے۔ دوسری جانب صارفین نے اس مؤقف کو مسترد کرتے ہوئے کہا کہ ادائیگی مقررہ تاریخ پر کی گئی، اس لیے بینک اور کمپنی کے باہمی معاملات کا بوجھ عوام پر ڈالنا ناانصافی ہے۔متاثرہ صارفین نے مطالبہ کیا ہے کہ اضافی جرمانے فوری طور پر ختم کیے جائیں اور ایسے معاملات کی شفاف تحقیقات کی جائیں تاکہ آئندہ شہریوں کو غیر ضروری مالی دباؤ کا سامنا نہ کرنا پڑے۔ شہری حلقوں نے اس صورتحال کو انتظامی غفلت قرار دیتے ہوئے اعلیٰ حکام سے نوٹس لینے کی اپیل کی ہے، جبکہ اسلام آباد میں صارفین کی جانب سے مزید احتجاج کا عندیہ بھی دیا گیا ہے.
