راولپنڈی(کرائم رپورٹر)سٹی ٹریفک پولیس راولپنڈی میں کار سیمولیٹر کی طرز پر کمرشل و ہیوی ڈرائیورز کیلیے جدید ڈرائیونگ سیمولیٹر متعارف۔تفصیلات کے مطابق چیف ٹریفک آفیسر کی خصوصی دلچسپی پر سٹی ٹریفک پولیس راولپنڈی کے ڈرائیونگ ٹریننگ سکول میں کار سیمولیٹر کی طرز پر ایل ٹی وی اور ایچ ٹی وی ڈرائیورز کی تربیت کے لیے جدید ڈرائیونگ سیمولیٹر متعارف کروا دیا گیا ، جس کا مقصد تربیت حاصل کرنے والے کمرشل اور ہیوی ڈرائیورز کو بہترین اور آسان ڈرائیونگ تربیت فراہم کرنے کے لیے جدید ٹیکنالوجی کا استعمال کو یقینی بنانا ہے .
کمرشل و ہیوی ڈرائیونگ سیمولیٹر کے ذریعے ڈرائیونگ سیکھنے والے بغیر کسی خطرے کے مختلف حالات میں گاڑی چلانے کی پریکٹس کر سکیں گے، اس جدید سیمولیٹر سے نہ صرف ٹریفک قوانین کی آگاہی دی جائے گی بلکہ مشکل اور ہنگامی حالات میں درست ردعمل کی تربیت بھی دی جائے گی، اس موقع پر چیف ٹریفک آفیسر راولپنڈی نے ڈرائیونگ ٹریننگ سیمولیٹر کا معائنہ کیا، انہوں نے اس موقع پر انچارج ڈرائیونگ سکول کو ہدایت کی کہ تربیت حاصل کرنے والوں کو ہر ممکن سہولت فراہم کی جائے .
تاکہ وہ محفوظ اور ماہر ڈرائیور بن سکیں،ان کا یہ بھی کہنا تھا کہ یہ اقدام نہ صرف ٹریفک حادثات کی روک تھام میں مددگار ثابت ہوگا بلکہ عوام کو ایک محفوظ سفری ماحول فراہم کرنے میں بھی معاون ہوگا اور جدید ٹریننگ کے ذریعے شہریوں کو بین الاقوامی معیار کی ڈرائیونگ تربیت فراہم کی جائے گی ، سٹی ٹریفک پولیس راولپنڈی کا یہ اقدام عوام میں ٹریفک قوانین کے احترام اور محفوظ ڈرائیونگ کے شعور کو فروغ دینے کے لیے اہم سنگ میل ثابت ہوگا۔
