راولپنڈی (نیوز رپورٹر)پارکس اینڈ ہارٹیکلچر اتھارٹی راولپنڈی کی جانب سے شہر بھر کے پارکس اور گرین بیلٹس کی سجاوٹ،عوام کو بہترین تفریحی اور سیکیورٹی کی سہولیات فراہم کرنے اور پارکوں کو سرسبز و خوبصورت بنانے کے حوالے سے خصوصی اقدامات اٹھائے جا رہے ہیں،ڈی جی پی ایچ اے احمد حسن رانجھا کی خصوصی ہدایات پر پی ایچ اے نے خیابانِ سرسید میں قائد اعظم پارک کی تزین و آرائش اور خوبصورت پھول پودوں سے سجاوٹ کا کام سرانجام دیا ہے.
قائد اعظم پارک میں رنگ برنگے اور سرسبز پھول پودوں کی بہار ایک دلکش منظر پیش کرتی ہے،جس سے پارک کے حسن اور تازگی میں اضافہ ہوتا ہے،پنجاب حکومت کے وژن کے مطابق پی ایچ اے راولپنڈی کے شہریوں کو بہترین تفریحی سہولیات فراہم کرنے کے لئے تمام وسائل بروئے کار لا رہا ہے، خوبصورت پھول اور سرسبز مناظر عوام کی توجہ کا مرکز ہیں،فیملیز،بچے اور تمام عمر کے افراد جب قائداعظم پارک کا رُخ کرتے ہیں تو بہترین تفریحی سہولیات سے لطف اندوز ہوتے ہیں،ڈی جی پی ایچ اے احمد حسن رانجھا کی خصوصی ہدایات پر خیابانِ سرسید میں قائد اعظم پارک میں بہترین سیکیورٹی کے انتظامات بھی کئے گئے ہیں،تاکہ پارک میں تفریح کے لئے آنے والے محفوظ رہ سکیں،پارک کی صاف صفائی کا بھی مکمل خیال رکھا جاتا ہے،عوام سے بھی التماس ہے کہ اپنے اردگرد ماحول کو صاف رکھا جائے،اس کے علاوہ پی ایچ اے کا عملہ نہایت محنت سے ہارٹیکلچر کا کام اور پھول پودوں کی نگہداشت کا کام بھی سرانجام دے رہا ہے.
ڈی جی پی ایچ اے احمد حسن رانجھا کا کہنا تھا کہ پنجاب حکومت کے وژن کے مطابق شہر کی عوام کو بہترین تفریحی سہولت اور سرسبز ماحول کی فراہمی کے لئے خصوصی اقدامات اٹھائے جا رہے ہیں،اس حوالے سے کسی قسم کی کوتاہی برداشت نہیں کی جائے گی،راولپنڈی کو خوبصورت اور سر سبز بنانے اور عوام کو ایک اچھا تفریحی ماحول فراہم کرنے کا عزم ہے،ڈی جی پی ایچ اے احمد حسن رانجھا نے مزید کہا کہ پارکس کی خوبصورتی کو برقرار رکھنے کے لئے پی ایچ اے کا عملہ اپنے فرائض سرانجام دے رہا ہے،عوام سے توقع کرتے ہیں کہ وہ ماحول کو صاف ستھرا اور سرسبز بنانے میں پی ایچ اے راولپنڈی کا ساتھ دیں گے.
