اسلام آباد (کرائم رپورٹر)اسلام آبادپولیس وائرلیس سٹاف سے ریٹائرڈ ہونے والے ہیڈکانسٹیبل عبدالمجید کے اعزاز میں پولیس لائنز ہیڈکوارٹرز میں ایک پروقار الوداعی تقریب کا انعقادکیا گیا، سینئر پولیس افسران نے ریٹائرڈ ہونے والے افسر کو پھول اور تحائف پیش کئے اور ان کے مستقبل کیلئے نیک تمناﺅ ں کا اظہار کیا۔
تفصیلات کے مطابق اسلام آبادپولیس وائرلیس سٹاف سے ریٹائرڈ ہونے والے ہیڈ کانسٹیبل عبدالمجید کے اعزاز میں پولیس لائنز ہیڈکوارٹرزمیں ایک پروقار الوداعی تقریب کا انعقادکیا گیا،تقریب میں سپرٹینڈنٹ آف پولیس کیپیٹل پولیس کالج نجیب شاہ نے بطور مہمان خصوصی شرکت کی، اس موقع پر ڈی ایس پی ٹیلی کمیونیکیشن سمیت دیگر پولیس افسران بھی موجود تھے، ایس پی سی پی سی نے ریٹائر ڈ ہونے والے پولیس افسرکی محکمہ پولیس کے لئے کی گئی خدمات کو سراہتے ہوئے کہا کہ ریٹائرمنٹ سروس کا حصہ ہے جس نے سروس شروع کی وہ ایک دن ریٹائرڈ بھی ہو گا،آپ نے ایک لمبا عرصہ محکمہ پولیس کی خدمت کی ہے، دوران سروس ہم سب کی کوشش ہونی چاہیے کہ ایسے کام کیے جائیں جس سے آپ کا نام روشن ہو اور آپ کے کردار کو اچھے الفاظ میں یاد رکھا جائے.
ہمیں اس بات کا عہد کرنا چاہیے کہ سروس کے دوران زیادہ سے زیادہ عوامی خدمت کرکے اللہ کی خوشنودی حاصل کی جائے،انہوں نے کہا کہ آپ نے اپنا زندگی کا قیمتی حصہ محکمہ پولیس میں گزار کر عوام کی خدمت کی، اس کے بدلے محکمہ پولیس نے بھی آپ کو عزت،وقار اور ایک مقام دیا جس پر آپ کو اللہ کا شکر گزار ہونا چاہیے،انہوں نے مزید کہا کہ آپ کو کوئی بھی نجی و سرکاری مسئلہ درپیش ہو تو میرے دفتر کا دروازہ ہر وقت کھلا ہے، اس موقع پر ریٹائرڈ ہونیوالے پولیس افسر نے عزت افزائی پر خوشی کا اظہار کرتے ہوئے ایس پی سی پی سی کا شکریہ ادا کیا ،تقریب کے آخر میں مہمان خصوصی نے ریٹائرڈ ہونے والے افسرکی خد مات کو سراہتے ہوئے انہیں تحائف پیش کئے اور ان کے مستقبل کیلئے نیک خواہشات کا اظہار کیا.
