راولپنڈی(کرائم رپورٹر)وزیر اعلیٰ پنجاب کے ویژن اور چیف ٹریفک آفیسر راولپنڈی بینش فاطمہ کی خصوصی ہدایات پر سٹی ٹریفک پولیس راولپنڈی نے عوامی سہولت اور فوری ردعمل کے لیے “ٹریفک ریسپانس یونٹ” قائم کر دیا ہے،ابتدائی طور پر اس یونٹ میں 10 موٹر سائیکلز اور 10 ٹریفک وارڈنز کو تعینات کیا گیا ہے جو دو زونز میں تقسیم کیے گئے ہیں.
زون 1 میں مصریال روڈ، ڈھوک سیداں، ٹینچ، اڈیالہ روڈ، برف خانہ، گرجا روڈ اور چکری روڈ شامل ہیں جبکہ زون 2 میں سول لائنز، مری روڈ، صدر، راجہ بازار، گنج منڈی، گوالمنڈی، فیض آباد اور صادق آباد جیسے اہم اور مصروف علاقے شامل کیے گئے ہیں، اس موقع پر سی ٹی او راولپنڈی کا کہنا تھا کہ یہ یونٹ ٹریفک کی روانی برقرار رکھنے، رش والے مقامات کی نشاندہی اور فوری کارروائی کے لیے فعال کردار ادا کرے گا،ریسپانس یونٹ کے افسراں اپنے موٹر سائیکلوں کے ہوٹر سائرنز اور پبلک ایڈریس سسٹم کا استعمال کریں گے تاکہ رش والے مقامات پر موجود شہریوں کو بروقت آگاہی دی جا سکے اور ٹریفک کو فوری کلیئر کیا جا سکے.
یونٹ کے افسران ہر چکر میں رش کی صورت میں متعلقہ علاقے کے ٹریفک سٹاف کو متحرک کریں گے اور عوامی مشکلات کو کم کرنے میں مدد فراہم کریں گے، ہر یونٹ اپنے زون میں ہر شفٹ میں کم از کم چار مرتبہ گشت کرے گی اور پٹولنگ کے بعد یونٹ ٹریفک ہیڈ کوارٹرز کے ڈیوٹی آفیسر کو شہر کی صورتحال سے متعلق رپورٹ کرے گی تاکہ ہیڈ کوارٹرز کو لمحہ بہ لمحہ ٹریفک کی صورتحال سے آگاہ رکھا جا سکے۔ سی ٹی او راولپنڈی بینش فاطمہ نے اس اقدام کو شہریوں کی سہولت اور جدید ٹریفک مینجمنٹ کی طرف ایک اہم قدم قرار دیا ہے اور اس بات کا اعادہ کیا ہے کہ سٹی ٹریفک پولیس جدید حکمت عملی اور عوامی تعاون سے راولپنڈی میں ٹریفک نظام کو مزید بہتر بنائے گی۔
