اسلام آباد (کرائم رپورٹر )آئی جی اسلام آباد کاآپریشنز ڈویژن میں بہترین کارکردگی کا مظاہرہ کرنے والے افسران کی حوصلہ افزائی مختلف مقدمات میں نمایاں کارکردگی دکھانے والے افسران کو نقد انعامات اور تعریفی اسنادسے نوازا اور اس عزم کا اظہار کیا کہ پولیس فورس اسی جذبے، لگن اور دیانتداری کے ساتھ فرائض کی ادائیگی جاری رکھے گی۔
تفصیلات کے مطابق اسلام آباد میں پولیس آپریشنز ڈویژن کے افسران و جوانوں کے اعزاز میں تقسیم تعریفی اسناد اور نقد انعامات کی تقریب کا انعقاد ہوا، جس میں انسپکٹر جنرل آف پولیس اسلام آباد سید علی ناصر رضوی نے بطور مہمان خصوصی شرکت کی،اس موقع پر ڈی آئی جی اسلام آباد محمد جواد طارق،ایس ایس پی آپریشنز اور دیگرا فسران بھی موجود تھے،آئی جی اسلام آباد نے آپریشنز ڈویژن میںبہترین کارکردگی اور اہم مقدمات کو پایہ تکمیل تک پہنچانے والے افسران و جوانوں کے ساتھ ملاقات کی .
ان کی فرائض منصبی میں اعلیٰ کارکردگی کو سراہتے ہوئے تعریفی اسناد اور نقد انعامات سے نوازا، اس موقع پر انہوں نے کہا کہ تمام افسران اسی جذبے کے ساتھ جرائم کے انسداد اور شہریوں کے جان و مال کی حفاظت کو یقینی بنانے کے لئے اپنے فرائض سر انجام دیں،ہمارا اولین فرض اور ہمارے اس حلف کا ہم سے تقاضا بھی یہی ہے جو ہم نے یہ وردی زیب تن کرتے ہوئے اٹھایا تھا ،انہوں نے تمام افسران کو مستعدی ،فرض شناسی اور ایمانداری کے ساتھ اپنے فرائض سرانجام دینے کی ہدایت کی،انہوں نے مزید کہا کہ تمام افسران اپنی نوکرکی کو عبادت سمجھ کر سرا نجام دیں،کیونکہ خوشدلی سے خدمت خلق کا جذبہ دلوں میں لیکر صرف نوکری نہیں بلکہ عبادت ہوتی ہے،اس موقع پر تمام افسران و جوانوں نے تعریفی اسناد اور انعامات کو اپنے لئے اعزاز قرار دیتے ہوئے اس عزم ظاہر کیا کہ وہ مستقبل میں بھی اسی جذبے کے ساتھ اپنے فرائض منصبی سر انجام دیتے رہیں گے.
