چمن(کرائم رپورٹر )ایف آئی اے بلوچستان زون کی کارروائیوں کے دوران حوالہ ہنڈی اور غیر قانونی کرنسی ایکسچینج میں ملوث دو ملزمان کو گرفتار کر کے لاکھوں روپے مالیت کی ملکی و غیر ملکی کرنسی برآمد کر لی گئی ہے۔
ڈی جی ایف آئی اے کی ہدایت پر ایف آئی اے کمپوزٹ سرکل چمن نے حوالہ ہنڈی اور غیر قانونی کرنسی ایکسچینج کے خلاف کارروائیاں تیز کر دی ہیں۔ گرفتار ملزمان کو چمن کے مختلف علاقوں سے گرفتار کیا گیا جہاں سے 22,000 امریکی ڈالر، 24,500 سعودی ریال، 113,760 افغانی اور 495,000 پاکستانی روپے برآمد ہوئے ، ابتدائی تفتیش کے مطابق ملزمان بغیر لائسنس کرنسی ایکسچینج کا غیر قانونی کاروبار چلا رہے تھے اور حوالہ ہنڈی میں بھی ملوث تھے۔ گرفتاری کے وقت ملزمان کے موبائل فونز اور حوالہ ہنڈی سے متعلق دیگر اہم شواہد بھی برآمد کیے گئے ہیں۔
ملزمان برآمد شدہ کرنسی کے حوالے سے حکام کو مطمئن نہ کر سکے، جس کے بعد انہیں حراست میں لے کر تفتیش شروع کر دی گئی ہے۔ ایف آئی اے حکام نے کہا ہے کہ ملزمان کے دیگر ساتھیوں کی گرفتاری کے لیے چھاپے مارنے کا سلسلہ جاری ہے تاکہ اس غیر قانونی نیٹ ورک کو مکمل طور پر بے نقاب کیا جا سکے ، ایف آئی اے بلوچستان زون کی جانب سے حوالہ ہنڈی اور غیر قانونی کرنسی کے کاروبار کے خاتمے کے لیے سخت اقدامات کیے جا رہے ہیں تاکہ مالی جرائم کو روکا جا سکے اور ملک کی معیشت کو تحفظ فراہم کیا جا سکے۔
