پاکستان سپر لیگ(پی ایس ایل) کے ساتویں ایڈیشن کے دوسرے مرحلے میں لاہور قلندرز نے ملتان سلطانز کو جیت کے لیے 183 رنز کا ہدف دے دیا۔
قذافی اسٹیڈیم لاہور میں کھیلے جارہے میچ میں ملتان سلطانز کے کپتان محمد رضوان نے ٹاس جیت کر لاہور قلندرز کو پہلے بیٹنگ کی دعوت دی۔
لاہور قلندرز نے مقررہ 20 اوورز میں4 وکٹوں کے نقصان پر 182 رنز بنائے، فخر زمان 60 رنز بناکر نمایاں رہے۔
ملتان سلطانز کے خلاف لاہور قلندرز کی اننگز کا آغاز اچھا نہ تھا ، اوپنر عبداللہ شفیق صرف 4 رنز بناکر آؤٹ ہوگئے۔
ایک وکٹ گرنے کے بعد فخر زمان اور کامران غلام کے درمیان 86 رنز کی شراکت داری قائم ہوئی تاہم 91 رنز کے مجموعی اسکور پر کامران 42 رنز بناکر آؤٹ ہوگئے ۔
قلندرز کو تیسرا نقصان سیٹ بیٹر فخر زمان کی صورت میں اٹھانا پڑا وہ37 گیندوں پر 60 رنز بناکر پویلین لوٹے۔
اس کے علاوہ اختتامی اوورز میں محمد حفیط اور فِل سالٹ کی جارحانہ بیٹنگ کی بدولت ٹیم کا اسکور 4 وکٹوں پر 182 رنز تک پہنچا۔
حفیظ 29 گیندوں پر 43 رنز بناکر آؤٹ ہوئے جبکہ سالٹ 16 گیندوں پر 26 رنز بناکر ناٹ آؤٹ رہے۔
ملتان سلطانز کی جانب سے انور علی، شاہنواز دھانی، عباس آفریدی اور عمران طاہر نے ایک، ایک وکٹ حاصل کی۔
لاہور قلندرز پی ایس ایل کے رواں سیزن میں اپنے ہوم گراؤنڈ پر پہلا میچ کھیل رہی ہے۔
پوائنٹس ٹیبل کی بات کی جائے تو ملتان سلطانز مسلسل 6 کامیابیاں حاصل کرنے کے بعد ٹاپ پوزیشن پر براجمان ہے جبکہ لاہور 5 میچز میں سے 3 میں فتح سمیٹ کے تیسرے نمبر پر موجود ہے۔
واضح رہے کہ گزشتہ روز ملتان سلطانز نے پشاور زلمی کو باآسانی 42 رنز سے شکست دی تھی۔
