راولپنڈی(کرائم رپورٹر )سٹی ٹریفک پولیس راولپنڈی کا جدت کی طرف ایک اور اہم قدم۔ نیوٹاؤن سیکٹر میں جدید ٹریفک پوسٹ کی تعمیر ۔چیف ٹریفک آفیسر راولپنڈی کی خصوصی دلچسپی پر عوامی سہولت کو مدنظر رکھتے ہوئے نیوٹاؤن سیکٹر میں جدید نو تعمیر شدہ ٹریفک پوسٹ کا قیام عمل میں لایا گیا ہے, اس جدید سہولت کا مقصد نہ صرف شہریوں کو فوری اور مؤثر ٹریفک خدمات فراہم کرنا ہے بلکہ ٹریفک وارڈنز اور اسٹاف کی ورکنگ کنڈیشنز و ماحول کو بھی مزید بہتر بنانا ہے ، سی ٹی او راولپنڈی بینش فاطمہ کی قیادت میں اس منصوبے کو عملی جامہ پہنایا گیا، جس کے تحت جدید طرز پر ٹریفک پوسٹ کا قیام عمل میں لایا گیا تاکہ ٹریفک کے بہتر نظم و ضبط کو یقینی بنایا جا سکے ، اس جدید پوسٹ میں ایک چھت کے نیچھے ڈی ایس پی آفس، سیکٹر انچارجز کاؤنٹرز، ڈیوٹی آفیسرز و ٹکٹنگ آفیسرز کاؤنٹرز اور ایک کشادہ کانفرنس ہال بھی شامل ہےجہاں ٹریفک قوانین پر تربیتی سیشنز اور بریفنگ کا انعقاد کیا جائے گا .
اس اقدام کا مقصد ٹریفک پولیس کے افسران اور سٹاف کو جدید طریقوں سے روشناس کروانا اور ٹریفک مینجمنٹ کو مزید فعال بنانا ہے، اس موقع پر سی ٹی او راولپنڈی کاکہنا تھا کہ عوامی سہولت کو مزید بہتر بنانے کے لیے جلد ہی ڈرائیونگ لائسنسنگ سینٹر کی خدمات بھی نیوٹاؤن سیکٹر میں فراہم کی جائیں گی، جہاں شہری بآسانی اپنا لرنر پرمٹ، ڈرائیونگ لائسنس کی دیگر سہولیات اور تجدید کی سہولیات سے بھی مستفید ھو سکیں گے ، اس پوسٹ کے قیام کی بدولت ان علاقوں میں ٹریفک کنٹرول مزید بہتر ہوگا اور ٹریفک قوانین کی پاسداری کو یقینی بنایا جا سکے گا .
سٹی ٹریفک پولیس راولپنڈی کی جانب سے سڑکوں پر ٹریفک کی روانی، شہریوں کی سہولت، اور ٹریفک قوانین کے نفاذ کے لیے جدید اقدامات کیے جا رہے ہیں ، اس حوالے سے سی ٹی او راولپنڈی نے شہریوں سے تعاون کی اپیل کی ہے تاکہ راولپنڈی میں ٹریفک کا نظام مزید بہتر بنایا جا سکے، ان کا یہ بھی کہنا تھا کہ شہری ٹریفک قوانین کی مکمل پاسداری کریں، غلط پارکنگ سے گریز کریں، اور ٹریفک پولیس کے ساتھ مکمل تعاون کریں تاکہ تمام شہریوں کے لیے محفوظ اور آرام دہ سفر کو یقینی بنایا جا سکے ، سٹی ٹریفک پولیس راولپنڈی عوام کی سہولت اور محفوظ سفر کے لیے ہمہ وقت کوشاں ہے۔
