فیصل آباد (سٹاف رپورٹر)وزیرمملکت برائے داخلہ سینیٹر طلال چوہدری نے این اے۔96 جڑانوالہ ضمنی انتخابات میں پولنگ اسٹیشن پر ووٹ کاسٹ کیا جس سے حلقے میں جاری ضمنی انتخاب کی سیاسی حرارت اور اس کی اہمیت مزید بڑھ گئی۔وزیرمملکت مقررہ وقت پر پولنگ اسٹیشن پہنچے جہاں انہوں نے منظم اور پرسکون ماحول میں اپنا حق رائے دہی استعمال کیا۔
ان کے ووٹ ڈالنے کے عمل نے الیکشن میں عوامی شرکت کی حوصلہ افزائی کی۔ پولنگ اسٹیشن کے عملے کے مطابق، حلقے میں ووٹرز کا تسلسل کے ساتھ آنا اس بات کا ثبوت ہے کہ مقابلہ خاصا دلچسپ ہے، خصوصاً اس پس منظر میں کہ حلقے میں سولہ امیدوار میدان میں ہیں جن میں مسلم لیگ (ن) کے ٹکٹ پر وزیرمملکت کے بھائی بلال چوہدری بھی شامل ہیں۔
انتخابی انتظامیہ نے بتایا کہ حلقے میں اب تک پولنگ مکمل طور پر پرامن رہی ہے اور کہیں سے بھی کسی ناخوشگوار واقعہ کی اطلاع موصول نہیں ہوئی۔ سخت سیکیورٹی اقدامات، مستقل نگرانی، جگہ جگہ تعینات اہلکاروں اور کنٹرول رومز سے کی جانے والی مانیٹرنگ نے انتخابی عمل کو شفاف اور بلا رکاوٹ جاری رکھنے میں مرکزی کردار ادا کیا ہے۔
الیکشن کمیشن کے ترجمان کا کہنا ہے کہ پولنگ صبح آٹھ بجے وقت مقررہ پر شروع ہوئی اور شام پانچ بجے تک بلا تعطل جاری رہے گی۔ انہوں نے ووٹرز پر زور دیا کہ وہ بلا خوف و خطر اپنے متعلقہ پولنگ اسٹیشنز پہنچیں اور جمہوری حق استعمال کرتے ہوئے انتخابی عمل کو کامیاب بنائیں۔
