اسلام آباد (کرائم رپورٹر )فیڈرل انویسٹی گیشن ایجنسی (FIA) نے انٹرنیشنل سینٹر فار مائیگریشن پالیسی ڈیولپمنٹ (ICMPD) کے تعاون سے 3 سے 5 دسمبر 2025 تک اسلام آباد میں تین روزہ بنیادی سطح کی OSINT تربیت کامیابی سے مکمل کی اس ورکشاپ میں ایف آئی اے، نیشنل سائبر کرائم انویسٹی گیشن ایجنسی (NCCIA)، پاکستان ٹیلی کمیونیکیشن اتھارٹی (PTA)، اور نیشنل سائبر کرائم ایمرجنسی ریسپانس ٹیم (NCERT) کے شرکاء نے حصہ لیا۔
تین روزہ تربیت کے دوران بین الاقوامی ماہرین نے سائبر کے ذریعے انسانی اسمگلنگ اور جعلی بھرتیوں پر تفصیلی سیشنز دیے، قانونی اور حکمت عملی کے پہلوؤں کو واضح کیا اور OSINT ٹولز کے مؤثر استعمال کا عملی مظاہرہ کیا۔ تربیت میں ڈیجیٹل شواہد کی جمع آوری، ورچوئل کرنسیز اور بلاک چین کے استعمال، اور جدید قانون نافذ کرنے والے اداروں میں AI ٹولز کے انضمام پر بھی توجہ دی گئی شرکاء نے عملی مشقوں اور سوال و جواب کے سیشن میں بھرپور حصہ لیا۔ ورکشاپ میں سوشل میڈیا، غلط معلومات، اور جعلی بھرتی کے ساتھ جڑی ہائبرڈ دھمکیوں پر بھی روشنی ڈالی گئی۔ اختتامی دن میں مشترکہ اجلاس اور بین الاگنسی تعاون کے ورک فلو پر تبادلہ خیال کیا گیا، جس سے معلومات کے تبادلے اور بہتر حکمت عملیوں کی تشکیل ممکن ہوئی۔
ورکشاپ کے نتیجے میں نہ صرف شرکاء کی تکنیکی صلاحیتیں مضبوط ہوئیں بلکہ اداروں کے درمیان بہتر تعاون اور محفوظ ڈیجیٹل ماحول کے قیام کا عزم بھی مضبوط ہوا۔ FJA-PAK منصوبے کے تحت جعلی ملازمتوں اور سائبر کے ذریعے انسانی اسمگلنگ کے خلاف پاکستان کی اجتماعی کوششوں میں یہ ایک اہم قدم ثابت ہوا۔
