ٹورنٹو (ویب ڈیسک) پاکستانی اداکارہ ماہرہ خان نے دوسری بار ماں بننے کے احساسات کا اظہار کرتے ہوئے کہا ہے کہ مجھے محسوس ہوتا ہے کہ یہ اللّٰہ کی جانب سے بھیجی گئی نعمت ہے اور اسی کا منصوبہ ہے ، کینیڈا کے شہر ٹورنٹو میں ایک کانفرنس کے دوران گفتگو کرتے ہوئے ماہرہ خان نے 41 سال کی عمر میں دوبارہ ماں بننے کے سفر اور اپنے جذبات کے بارے میں بات کی۔
اداکارہ کا کہنا تھا کہ مجھے ایسا محسوس ہوتا ہے جیسے یہ سب اللّٰہ کی جانب سے بھیجا گیا ہے، ان شاء اللّٰہ میں ماں بننے والی ہوں، انہوں نے اللّٰہ کی مہربانی اور شفقت پر شکر ادا کرتے ہوئے کہا ہے کہ میں اس نئے سفر کو ایمان اور بھروسے کے ساتھ قبول کر رہی ہوں۔
یاد رہے کہ ماہرہ خان ان دنوں ٹورنٹو انٹرنیشنل فلم فیسٹیول میں شرکت کے لیے کینیڈا میں موجود ہیں، جہاں انہوں نے میڈیا سے گفتگو کے دوران دوبارہ ماں بننے کے تجربے کے بارے میں کھل کر بات کی ، اس سے قبل ماہرہ خان نے انسٹاگرام پر ایک جذباتی پیغام کے ذریعے دوسری بار ماں ببنے کی خوش خبری سنائی تھی، انہوں نے تصویر شیئر کرتے ہوئے لکھا تھا کہ انسان منصوبے بناتا ہے، پھر اللّٰہ کا منصوبہ ہوتا ہے۔
