راولپنڈی(کرائم رپورٹر) سٹی ٹریفک پولیس راولپنڈی کے ھیڈکوارٹرز میں دوسرے اوپن ڈے کا انعقاد ۔تفصیلات کے مطابق چیف ٹریفک آفیسر راولپنڈی کی خصوصی دلچسپی پر پچھلے بدھ طرح آج بھی کنکورڈیا کالج اور روٹس کالج کے 125 سے زائد سٹوڈنٹس اور اساتذہ کو ٹریفک ھیڈ کوارٹرز ریس کورس مدعو کیا گیا۔ اس دورے کا مقصد سٹوڈنٹس کو ٹریفک پولیس کے روزمرہ کے امور اور ٹریفک پولیس کی سروسز کے بارے میں آگاہی دینا تھا تا کہ عوام الناس اور پولیس کے درمیان خلا کو دور کرنے میں مدد مل سکے۔ ٹریفک ھیڈکوارٹرز ریس کورس پہنچنے پر سی ٹی او راولپنڈی کے خصوصی احکامات پر ڈی ایس پی ٹریفک ھیڈکوارٹرز اور دیگر سٹاف نے ان کا استقبال کیا.بعد ازاں ٹریفک ھیڈکواٹرز کے کانفرنس ہال میں ڈی ایس پی ٹریفک ھیڈکوارٹرز نے طلباء طالبات و اساتذہ کے اعزاز میں منعقد کی گئی تقریب سے خطاب کرتے ھوۓ کہا کہ اس اوپن ڈے کے انعقاد کا مقصد نوجوان نسل کے اندر ٹریفک قوانین سے متعلق شعور بیدار کرنا ھے، انکا کہنا تھا کہ ٹریفک قوانین پر عمل کرنا مہذب قوموں کی پہچان ھے ،نوجوان نسل نے اس ملک کی ڈور سنبھالنی ھے لہذا ان کے روشن مستقبل کے لئے دیگر قوانین کی طرح ٹریفک قوانین سے آگاہی اور عملدرآمد اشد ضروری ھے،انھوں نے سٹوڈنٹس کو روڈ سیفٹی اور ٹریفک پولیس کا نمائندہ قرار دیتے ھوۓ کہا کہ وہ یہ پیغام اپنے گھروں،دوستوں اور حلقہ احباب تک پہنچانے کی ذمہ داری بھی نبھائیں .
اسکے بعد سٹوڈنٹس کو ٹریفک ھیڈکوارٹرز کی مختلف برانچز کا دورہ کروایا گیا اور ان کو ٹریفک پولیس کے روزانہ کے امور کی انجام دہی سے متعلق بریفنگ دی گئی، اور انھیں مختلف اشیاء کا معائنہ کرایا گیا، اس دوران طلبا و طالبات نے ٹریفک پولیس کی روزمرہ استعمال کی اشیاء میں بہت دلچسپی لی، خصوصی دورے پر آۓ ھوۓ طلباء و طالبات نے ایف ایم 88.6 کی لائیو نشریات میں بھی شرکت کی اور ایجوکیشن ونگ کے روڈ ریڈی میٹ پروجیکٹ کو بہت سراہا ، شریک طالبات نے سی ٹی او راولپنڈی کی طرف سے ویمن آن ویلز پروگرام کے لیے خریدی گئی نئی سکوٹیز میں دلچسپی کا اظہار کرتے ھوۓ ان کی ٹریننگ سے متعلق معلومات بھی لیں۔ آخر میں اساتذہ نے سٹی ٹریفک پولیس راولپنڈی کی اس کاوش کو سراہتے ھوۓ سی ٹی او راولپنڈی کا شکریہ بھی ادا کیا۔
