نئی دہلی: بھارتی کرکٹ ٹیم کے اسپنر یوزویندر چاہال اور ان کی اہلیہ دھناشری ورما کے درمیان طلاق کی افواہیں سوشل میڈیا پر موضوع بحث بن گئی ہیں۔
بھارتی میڈیا کے مطابق، یہ قیاس آرائیاں اس وقت شدت اختیار کر گئیں جب دونوں نے ایک دوسرے کو انسٹاگرام پر ان فالو کر دیا۔ اطلاعات کے مطابق، دھناشری ورما کے کسی اور سے تعلقات کی افواہیں بھی زیر گردش ہیں، جس کی وجہ سے وہ یوزویندر سے علیحدگی اختیار کرنا چاہتی ہیں۔
مزید برآں، چاہال نے مبینہ طور پر اپنی انسٹاگرام پوسٹس کو حذف کر دیا ہے جن میں دھناشری شامل تھیں۔ تاہم، دونوں کی جانب سے اب تک ان افواہوں کی کوئی تصدیق یا تردید نہیں کی گئی۔
دھناشری ورما اور پراتیک اتیکر کی تصویر پر تبصرے
یہ افواہیں اس وقت مزید شدت اختیار کر گئیں جب دھناشری ورما کی ایک تصویر کوریوگرافر پراتیک اتیکر کے ساتھ وائرل ہوئی۔ دونوں کو ایک ڈانس ریئلٹی شو ‘جھلک دکھلا جا’ کے بعد ایک ساتھ دیکھا گیا، جس میں وہ سیاہ لباس پہنے ہوئے تھے۔
پراتیک اتیکر، جو ایک مشہور کوریوگرافر ہیں، نے کئی بالی ووڈ ستاروں جیسے سلمان خان، پریانکا چوپڑا، مادھوری ڈکشٹ، اور نورا فتحی کے ساتھ کام کیا ہے۔ ان کا دھناشری کے ساتھ کام کرنے کا پس منظر بھی ان قیاس آرائیوں کو ہوا دے رہا ہے۔
پراتیک کی ذو معنی پوسٹ
پراتیک اتیکر نے حالیہ دنوں میں انسٹاگرام پر ایک ذو معنی پوسٹ شیئر کی جس سے ان افواہوں کو مزید تقویت ملی اور سوشل میڈیا صارفین نے ان پر تنقید شروع کر دی۔
شادی اور موجودہ صورتحال
دسمبر 2020 میں شادی کرنے والے اس جوڑے کو ان کی کیمسٹری اور متحرک شخصیت کے باعث کافی سراہا جاتا تھا۔ تاہم، حالیہ واقعات نے ان کے تعلقات پر سوالیہ نشان لگا دیا ہے۔
یوزویندر چاہال یا دھناشری ورما کی جانب سے افواہوں پر کوئی واضح بیان جاری نہیں کیا گیا، اور مداحوں کو ان کی جانب سے وضاحت کا انتظار ہے۔
