راولپنڈی (سٹاف رپورٹر)پاک افغان بارڈر پر 11 اور 12 اکتوبر کی شب افغان عبوری حکومت کی بلا اشتعال اور بزدلانہ حملوں کے خلاف مادر وطن کا دفاع کرتے ہوئے شہید ہونے والے 12 شہداء کی نماز جنازہ چکلالہ گیریژن راولپنڈی میں ادا کردی گئی،،
آئی ایس پی آر کے مطابق نماز جنازے میں آرمی چیف فیلڈ مارشل سید عاصم منیر، وفاقی وزراء، گورنر کے پی کے، سول و فوجی حکام اور عوام کی بڑی تعداد نے شرکت کی، اس موقع پر اظہار خیال کرتے ہوئے وزیر دفاع نے کہا کہ پاکستانی عوام ان ہیروز کی لازوال قربانیوں کے مقروض ہیں، جنہوں نے طالبان حکومت کی بزدلانہ اشتعال انگیزی کے خلاف پاکستان کی علاقائی سالمیت کا دفاع کرتے ہوئے اپنی جانیں نچھاور کیں اور افغان سرزمین کے اندر سے دہشت گردی میں ملوث بھارتی پراکسیز کا بہادری سے مقابلہ کیا، انہوں نے مزید کہا کہ پاکستان کی مسلح افواج قوم کی مکمل حمایت سے پاکستان کے خلاف کسی بھی جارحیت اور سازش کو ناکام بنانے کے لئے پرعزم ہیں.
