اسلام آباد(سٹاف رپورٹر)وفاقی وزیر داخلہ محسن نقوی سے آسٹریلیا کے ہائی کمشنر نیل ہاکنز نےیہاں ملاقات کی جس میں پاک آسٹریلیا تعلقات، باہمی تعاون کے فروغ اور مختلف شعبوں میں اشتراکِ عمل بڑھانے پر تفصیلی بات چیت ہوئی۔ملاقات میں کوسٹ گارڈز، بارڈر مینجمنٹ اور انسانی سمگلنگ کی روک تھام کے لیے تعاون کو مزید مؤثر بنانے پر بھی اتفاق کیا گیا۔
آسٹریلوی ہائی کمشنر نے دہشت گرد حملوں اور حالیہ ناخوشگوار واقعات میں پولیس افسر سمیت سکیورٹی فورسز کے اہلکاروں کی شہادت پر گہرے دکھ اور افسوس کا اظہار کیا۔ہائی کمشنر نیل ہاکنز نے وزیر داخلہ محسن نقوی کی قیادت میں اسلام آباد کے فلاحی و ترقیاتی منصوبوں کی تعریف کرتے ہوئے کہا کہ ان سے شہر میں نمایاں بہتری آئی ہے۔ انہوں نے قذافی سٹیڈیم کی خوبصورت بحالی کو بھی سراہا اور کہا کہ پاکستان میں گزارا گیا وقت یادگار ہے جبکہ لاہور میں دربار بی بی پاک دامن ان کی پسندیدہ جگہ ہے۔
نیل ہاکنز نے کہا کہ موجودہ دور میں پاکستان کا بین الاقوامی وقار اور مقام نمایاں طور پر بڑھا ہے۔اس موقع پر وزیر داخلہ محسن نقوی نے کہا کہ پاکستان غیر قانونی امیگریشن کی حوصلہ شکنی اور قانونی امیگریشن کے فروغ پر یقین رکھتا ہے۔ غیر قانونی طور پر بیرون ملک جانے والے افراد کو وطن واپسی پر سخت قانونی کارروائی کا سامنا کرنا پڑے گا۔ انہوں نے واضح کیا کہ انسانی سمگلنگ میں ملوث عناصر سے آہنی ہاتھوں سے نمٹا جا رہا ہے۔
وزیر داخلہ نے دوطرفہ تعلقات کے فروغ میں آسٹریلوی ہائی کمشنر نیل ہاکنز کی کاوشوں کو سراہتے ہوئے ان کے مستقبل کے لیے نیک خواہشات کا اظہار کیا۔اس موقع پر وزیر مملکت طلال چوہدری، وفاقی سیکرٹری داخلہ خرم آغا اور آسٹریلوی ہائی کمیشن کے اعلیٰ حکام بھی موجود تھے۔
