کراچی: قومی ائیر لائن پی آئی اے نے یوکرین میں پھنسے پاکستانیوں کو واپس لانے کیلئے فضائی آپریشن ترتیب دے دیا۔
پی آئی اے کی جانب سے اتوار کے روز 2 پروازیں پاکستان سے پولینڈ روانہ کرنے کی تیاری مکمل کرلی گئی ہے۔
پی آئی اے کا کہنا ہےکہ بڑے جہازوں کے آپریشن کیلئے یوکرین پولینڈ سرحد کے قریب شہروں خصوصاً لبلن ائیرپورٹ پر انتظامات ناکافی ہیں اس لیے پروازیں ممکنہ طور پر پولینڈ کے دارالحکومت وارسا پہنچیں گی۔
پی آئی اے کے مطابق پروازوں کی حتمی روانگی لوگوں کے پولینڈ پہنچنے کے بعد ہوگی۔
قومی ائیرلائن کے حکام کا کہنا ہےکہ پی آئی اے کی انتظامیہ، وزارت خارجہ اور پاکستانی سفارتی عملے سے مکمل رابطے میں ہے جب کہ پاکستانی سفارت خانہ تمام ایسے افراد سے رابطہ کررہا ہے اور ان کو معلومات مہیا کررہا ہے۔
