معرکہ حق کی فتح سے آزادی کا جشن منفرد اور دوبالا ہو گیا ہے، عطاء اللہ تارڑ

اسلام آباد۔ (سٹاف رپورٹر)وفاقی وزیر اطلاعات و نشریات عطاء اللہ تارڑ نے کہا ہے کہ معرکہ حق کی فتح سے آزادی کا جشن منفرد اور دوبالا ہو گیا ہے۔ بدھ کو یہاں پارلیمنٹ ہائوس میں میڈیا سے گفتگو کرتے ہوئے وفاقی وزیر اطلاعات نے کہا کہ قوم اس وقت نہ صرف یوم آزادی کا جشن منا رہی ہے بلکہ معرکہ حق کی فتح کا جشن بھی پورے جوش و خروش سے منایا جا رہا ہے۔ اللہ تعالیٰ نے ہمیں آزدی کی نعمت سے نوازا اور آزاد فضائوں میں سانس لینے کا شرف بخشا۔

ایک سوال کے جواب میں وفاقی وزیر اطلاعات نے کہا کہ چھوٹے بچوں سے لے کر بزرگوں تک ہر پاکستانی سبز ہلالی پرچم تھامے گھروں سے باہر نکلا ہوا ہے، عوام اپنی فیملیز کے ہمراہ پارلیمنٹ ہائوس سمیت دیگر اہم عمارتوں کے سامنے قومی پرچموں کے سائے تلے خوشیاں منا رہے ہیں۔ انہوں نے کہا کہ اس وقت ہم سب پاکستانی ہیں، بحیثیت پاکستانی قوم ہم آزادی کا جشن منا رہے ہیں۔

انہوں نے کہا کہ یہ جشن بھارت کے لئے بھی ایک واضح پیغام ہے کہ زندہ قومیں اپنی آزادی کا جشن اور فتح کی خوشی کس انداز سے مناتی ہیں۔ انہوں نے بتایا کہ آج رات ٹھیک 12 بجے اسلام آباد سمیت ملک کے مختلف شہروں میں شاندار آتش بازی کا مظاہرہ کیا جائے گا جسے ٹی وی سکرینز پر براہ راست دکھایا جائے گا۔ اسلام آباد میں بھی ایک بڑی تقریب منعقد ہو رہی ہے، جشن آزادی کی تقریبات میں ملی نغمے اور پریڈ بھی شامل ہوں گی۔

عطا اللہ تارڑ نے کہا کہ کل صبح ملک کے مختلف مقامات پر پرچم کشائی کی تقریبات ہوں گی، شکرپڑیاں پریڈ گرائونڈ میں بھی خصوصی تقریب کا اہتمام کیا گیا ہے، ٹی وی سکرینز پر رات آٹھ سے بارہ بجے تک جشن کی تقریبات براہ راست نشر ہوں گی، پوری قوم اور پوری دنیا اس کو دیکھے گی۔

وفاقی وزیر اطلاعات نے پوری قوم کو جشن آزادی اور معرکہ حق کی فتح کی مبارکباد دیتے ہوئے کہا کہ یہ تاریخی موقع پاکستان کے اتحاد، عزم اور حوصلے کی روشن علامت ہے۔ ایک سوال کے جواب میں انہوں نے کہا کہ مری میں ہونے والے اجلاس میں ضمنی انتخابات کے حوالے سے مشاورت ہوئی تھی، مریم اورنگزیب ملک سے باہر تھیں اور میرے ایک بھائی حلقے سے امیدوار ہیں، اس لئے میں اجلاس میں شریک نہیں ہو سکا۔