اسلام آباد (سٹاف رپورٹر )وفاقی وزیر برائے ریلوے محمد حنیف عباسی نے 1965ء کی جنگ کے ہیرو، نشانِ حیدر میجر عزیز بھٹی شہید کو شاندار الفاظ میں خراجِ عقیدت پیش کیا ہے۔ یومِ دفاع کے موقع پر اپنے پیغام میں انہوں نے کہا کہ “میجر عزیز لاہور کے شیر تھے، جنہوں نے دشمن کے ناپاک عزائم کو خاک میں ملا دیا۔”
محمد حنیف عباسی نے کہا کہ میجر عزیز بھٹی شہید کی بہادری اور قربانی آج بھی پاک فوج کے نوجوانوں کے لیے مشعلِ راہ ہے۔ انہوں نے مزید کہا کہ “میجر عزیز نے جو تاریخ اپنے خون سے رقم کی، اس کا نیا باب میجر عدنان نے اپنی جانفشانی سے تحریر کیا۔ میجر عزیز سے میجر عدنان تک، ہمارے بہادر جوانوں نے ہمیشہ مادرِ وطن کا دفاع کیا ہے۔”
وزیر ریلوے نے کہا کہ پاکستانی فوج کے جوانوں نے اپنی جانوں کا نذرانہ دے کر ملک کی حفاظت کی ہے اور ان کی لازوال قربانیاں پاکستان کی اصل کہانی اور فخر ہیں۔
انہوں نے قوم سے اپیل کی کہ شہداء کی قربانیوں کو ہمیشہ یاد رکھا جائے اور نئی نسل کو ان کے جذبۂ قربانی سے روشناس کروایا جائے۔
