اسلام آباد (سٹاف رپورٹر)وفاقی وزیر داخلہ محسن نقوی کی ہدایت پر ٹی چوک، فلائی اوور منصوبے پر جاری تعمیراتی کاموں کو مزید تیز کر دیا گیا۔ چیئرمین کیپیٹل ڈویلپمنٹ اتھارٹی (سی ڈی اے) و چیف کمشنر اسلام آباد محمد علی رندھاوا نے جمعرات کے روز سی ڈی اے کے متعلقہ افسران، کنٹریکٹر، کنسلٹنٹ اور پراجیکٹ ڈائریکٹر کے ہمراہ ٹی چوک، روات فلائی اوور منصوبے کا دورہ کیا اور ترقیاتی سرگرمیوں کا تفصیلی جائزہ لیا ، چیئرمین سی ڈی اے محمد علی رندھاوا کو بریفننگ دیتے ہوئے بتایا گیا کہ منصوبے کا 100 فیصد پائلنگ ورک مکمل ہوچکا ہے۔
اسی طرح گرڈرز کاسٹنگ کا کام 84 فیصد اور حفاظتی دیواروں کا 60 فیصد کام بھی مکمل ہوچکا ہے۔ بریفننگ دیتے ہوئے انہیں بتایا گیا کہ منصوبے پر 24/7 تعمیراتی سرگرمیاں تیزی سے جاری ہیں ، چیئرمین سی ڈی اے نے ترقیاتی کاموں پر ہونے والی پیشرفت پر اطمینان کا اظہار کیا اور منصوبے کو دیدہ زیب بنانے کیلئے لینڈ سکیپنگ و ہارٹیکلچر پلان جلد پیش کرنے کی ہدایت کی۔ انہوں نے کہا کہ تعمیراتی کاموں میں تیزی لا کر منصوبے کو اس کی ٹائم لائن کے مطابق مکمل کیا جائے۔
چیئرمین سی ڈی اے نے کہا کہ منصوبے کے اطراف مستقل بنیادوں پر خوبصورت ایل ای ڈی لائٹس نصب کی جائیں۔ انہوں نے ترقیاتی کاموں کی تکمیل والے مقامات پر صفائی ستھرائی یقینی بنانے کی ہدایت کی اور کہا کہ تعمیراتی کاموں کے اعلیٰ معیار کو ہر صورت یقینی بنایا جائے ، چیئرمین سی ڈی اے نے کہا کہ ٹی چوک فلائی اوور منصوبے سے جڑواں شہروں کے علاوہ لاہور/ پنجاب سے آنے والے مسافروں کو سگنل فری سفری سہولت میسر آئی گی۔ انہوں نے ہدایت کی کہ کنسلٹنٹس اور ریذیڈنٹ انجینئرز تعمیراتی کاموں کی بروقت تکمیل اور اعلیٰ معیار کو ہر صورت یقینی بنائیں۔
