اسلام آباد (سٹاف رپورٹر )وزارتِ مذہبی امور کے زیر اہتمام چالیسواں قومی مقابلہ حفظ و قرأت کل (بدھ کو) اسلام آباد میں منعقد ہو گا۔ منگل کو وزارت مذہبی امور کے مطابق ملک بھر سے ضلعی و صوبائی مقابلوں میں منتخب حفاظ و قرا قومی مقابلے میں شریک ہوں گے۔ دو روزہ قومی مقابلہ حفظ قرآن و حُسنِ قرأت میں انعام پانے والوں کا اعلان جمعرات کو کیا جائے گا۔
چاروں صوبوں بشمول گلگت بلتستان، آزاد کشمیر و اسلام آباد اور فورسز سے منتخب حفاظ اور قرا مقابلے میں حصہ لیں گے۔ حافظہ اور قاریہ خواتین اور بچیوں کے لیے چار الگ کیٹگریاں مختص کی گئی ہیں۔ قومی مقابلہ حفظ و قرأت کے انعام یافتگان کو نقد انعامات اور نومبر میں پاکستان کے پہلے عالمی مقابلے میں نمائندگی کا موقع ملے گا۔ ترجمان نے کہا کہ قومی مقابلے قرآنی علوم سے وابستہ نوجوان بچے بچیوں کی حوصلہ افزائی کا بہترین ذریعہ ہیں۔
