اسلام آباد(سٹاف رپورٹر )پاکستان اور سعودی عرب کے درمیان ڈیجیٹل تعاون کو فروغ دینے کے ایک تاریخی اقدام کے تحت، “گو اے آئی ہب پاکستان” کا آج اسلام آباد میں افتتاح کیا گیا۔ یہ منصوبہ وزارتِ انفارمیشن ٹیکنالوجی و ٹیلی کمیونیکیشن (MoIT&T) اور سعودی عرب کی کمپنی “گو ٹیلی کام” (اتحاد اثير ٹیلی کمیونیکیشن کمپنی) کے اشتراک سے شروع کیا گیا ہے یہ سنگِ میل مصنوعی ذہانت، ڈیٹا انفراسٹرکچر اور افرادی وسائل کی ترقی کے شعبوں میں دوطرفہ تعاون کو مزید مضبوط بنانے کی جانب ایک اہم قدم ہے، جسے اسپیشل انویسٹمنٹ فسیلیٹیشن کونسل (SIFC) کے تحت سعودی عرب کے ساتھ اسٹریٹجک سرمایہ کاری کی شراکت داری کے فروغ کے لیے ممکن بنایا گیا۔
اس اعلیٰ سطحی تقریب میں وفاقی وزیر برائے آئی ٹی و ٹیلی کمیونیکیشن محترمہ شزا فاطمہ خواجہ، سی ای او گو ٹیلی کام جناب یحییٰ بن صالح المنصور، SIFC کے سینئر حکام اور پاکستان کے ٹیکنالوجی ایکو سسٹم کے نمائندگان نے شرکت کی سی ای او گو ٹیلی کام جناب یحییٰ بن صالح المنصور نے پاکستان کی ڈیجیٹل ترقی کے لیے اپنی کمپنی کے طویل المدتی عزم کا اعادہ کیا۔ یہ منصوبہ SIFC فریم ورک کے تحت اعلیٰ سطحی روابط کے نتیجے میں وجود میں آیا، جو وزیراعظم کے حالیہ دورۂ ریاض کے بعد عملی شکل اختیار کر گیا۔ دستخط شدہ مفاہمتی یادداشتوں کا تعلق ڈیٹا سینٹر اور اے آئی انفراسٹرکچر کی ترقی، گو ٹیلنٹ ہب کے قیام اور گو اے آئی ہب پاکستان کے عملی آغاز سے ہے۔
یہ پیش رفت SIFC اور وزارتِ آئی ٹی و ٹیلی کمیونیکیشن کی اس کامیابی کا مظہر ہے جس کے ذریعے دوطرفہ ارادوں کو عملی شراکت داریوں میں تبدیل کیا گیا، جو پاکستان کی ڈیجیٹل تبدیلی کو فروغ دیتے ہوئے دونوں ممالک کو عالمی اختراعی منظرنامے میں کلیدی شراکت داروں کے طور پر ابھار رہی ہے.
