راولپنڈی(سٹاف رپورٹر) ڈائریکٹر جنرل راولپنڈی ڈویلپمنٹ اتھارٹی کنزہ مرتضیٰ نے ڈیجیٹل گورننس کے فروغ، شفافیت میں اضافے اور عوامی خدمات کی بہتری کے لیے آر ڈی اے کی نئی سرکاری ویب سائٹ اور ایک علیحدہ کمپلینٹ مینجمنٹ سسٹم (سی ایم ایس) کا باقاعدہ افتتاح کر دیا ہے۔
نئی آر ڈی اے ویب سائٹ کو جدید تقاضوں کے مطابق اسٹیٹ آف دی آرٹ اور صارف دوست ڈیجیٹل پلیٹ فارم کے طور پر تیار کیا گیا ہے، جس کے ذریعے شہریوں، اسٹیک ہولڈرز، ڈیولپرز اور سرمایہ کاروں کو معلومات اور آن لائن سہولیات تک بہتر اور باآسانی رسائی حاصل ہو سکے گی۔ ویب سائٹ میں بہتر کارکردگی، آسان نیویگیشن، تازہ ترین مواد، موبائل ریسپانسیو ڈیزائن اور جدید آئی ٹی معیارات کے مطابق بہتر رسائی جیسی خصوصیات شامل کی گئی ہیں۔ اس موقع پر ایک علیحدہ اور مؤثر کمپلینٹ مینجمنٹ سسٹم بھی متعارف کرایا گیا ہے، جس کا مقصد عوامی شکایات کے شفاف، بروقت اور مؤثر ازالے کو یقینی بنانا ہے۔ یہ نظام شکایات کے اندراج، ٹریکنگ، مانیٹرنگ اور حل کے عمل کو منظم بناتا ہے.
جس سے ادارہ جاتی احتساب، کارکردگی اور سروس کوالٹی میں نمایاں بہتری آئے گی۔ ڈی جی آر ڈی اے کنزہ مرتضیٰ نے کہا کہ اس اقدام کا مقصد آر ڈی اے اور عوام کے درمیان مؤثر رابطے کو فروغ دینا، انتظامی امور میں شفافیت لانا اور خدمات کی فراہمی کو مزید بہتر بنانا ہے۔ نئی ویب سائٹ اور سی ایم ایس سرکاری اعلانات، عوامی معلومات، محکمانہ اپ ڈیٹس، آن لائن سہولیات اور شکایات کے ازالے کے لیے مرکزی پلیٹ فارم کے طور پر کام کریں گے۔ انہوں نے اس عزم کا اظہار کیا کہ آر ڈی اے جدید ٹیکنالوجی کے استعمال کے ذریعے شہریوں کو سہولیات فراہم کرنے، خدمات کے معیار کو بہتر بنانے اور بروقت معلومات کی فراہمی کے لیے بھرپور اقدامات جاری رکھے گا، جو اچھی حکمرانی کے وژن کے عین مطابق ہے۔ ڈی جی آر ڈی اے نے مزید کہا کہ ان ڈیجیٹل پلیٹ فارمز کے اجراء سے دستی کارروائیوں میں کمی، ردعمل کے وقت میں بہتری اور متعلقہ محکموں کے درمیان بہتر ہم آہنگی ممکن ہو سکے گی۔
انہوں نے شہریوں پر زور دیا کہ وہ آر ڈی اے کی ویب سائٹ اور کمپلینٹ مینجمنٹ سسٹم کو بھرپور طریقے سے استعمال کریں، اپنی شکایات درج کروائیں، آن لائن سہولیات سے فائدہ اٹھائیں اور آر ڈی اے کے منصوبوں اور سرگرمیوں سے باخبر رہیں۔ آخر میں بتایا گیا کہ آر ڈی اے کی نئی سرکاری ویب سائٹ اور کمپلینٹ مینجمنٹ سسٹم عوام کے لیے باقاعدہ طور پر فعال کر دیے گئے ہیں۔
